Eskolako Agenda 21en barruan zarata aztertu dute, eta udalari gaiarekin lotutako eskaerak egin dizkiote
Herriko hiru ikastetxeetako ikasleen ordezkariak udalarekin bildu ziren.
Ikasturte honetan zehar, Lezo Herri Eskolako, Lezo Institutuko eta Pasaia-Lezo Lizeoko ikasleek zarata landu dute Eskolako Agenda 21en barruan. Bertan hartutako konpromisoak azaldu zituzten pasa den asteartean, udalarekin egindako foroan. Udalaren aldetik Jose Angel Sanchez Ingurumen zinegotziak eta Leire Beteta saileko teknikariak hartu zuten parte.
Ikasleek hainbat jarduera egin dituzte kutsadura akustikoarekin lotuta. Besteak beste, zarata eta soinua bereizten ikasi dute. Bakoitzaren ikastetxeko zarata neurtu eta zarata-mapa osatu dute baita ere, mugikorrerako aplikazio baten bitartez. Ez dute, baina, hezkuntza zentro inguruan neurtu: herritarren artean galdetegiak egin dituzte, eta zuzeneko neurketak egin dituzte hainbat txokotan (Altamira, Saldise, Polentzarrene, kiroldegia…). Azterketa horren arabera, zarata iturri nagusiak portua eta trafikoa izan dira, baita jaialdi zein tabernen musika ere, kaleak garbitzeko makinez gain.
Konpromisoak eta eskaerak
Ikasleek hartutako konpromisoen artean, ikasgelan zein ikastetxeetako eremuetan doinu egokian eta errespetuz hitz egitea izan zen. Gainera, gauzak arrastaka mugituko ez dituztela hitz eman zuten, baita lasai ibiltzekoa ere.
Udalari hainbat eskaera luzatu zizkioten. Portuek, errepideek eta trenbideek sortzen duten zarata maila gutxitzeko neurriak hartzeko eskatu zieten asteartean. Gainera, kaleko musika emanaldien ordutegia kontrolatzea galdegin zuten.
Zerrenda luzeagoa da: zarata kutsadura foko nagusien jarraipena egitea; kotxe elektrikoa sustatzeko onura fiskalak ematea; oinezkoentzako eremuak handitzea; autobusei motorra itzaltzeko eskatzea; zaborra biltzen duten kamioien ordutegia aldatzea; gune berdeak gehitzea; sentsibilitate kanpainak bultzatzea…
Bukatzeko, datorren urtean landuko duten gaia iragarri zuten: klima aldaketa izango da.
