Etorkizunaren Alde plataformako kide, eta aldi berean Oreretako hiru gazte auzipetuetako baten aitak epaiaren lehen balorazioa egin du HITZAn.
Etorkizunaren Aldek aurretik egindako agerraldi baten irudia.
Absoluzioa nahi zuten Etorkizunaren Alde plataformako kideek. Baina gaur Espainiako Auzitegi Nazionalak
Oreretako hiru gazteen eta Beasaingo baten epaiketaren harira emandako epaia, “bigarren albiste onena” izan dela jakinarazi du Patxi Petrirenak, Etorkizunaren Alde plataformako kide, eta auzipetutako baten aitak. “Sententzia oraindik irakurtzen ari naiz [16:30ean hitz egin du HITZAk Petrirenarekin], ez dut osorik irakurri. Pasatu ditugunak pasatuta, izan zitezkeen albisterik onenen artean bigarrena izan da”. Albisterik onena absoluzioa zen plataformako kideentzat.
Gaur goizean jakinarazi du Espainiako Auzitegi Nazionalak 2017ko martxoaren 11n Iruñean atxilotu zituzten hiru gazteen auziaren sententzia. Bi urteko zigorra ezarri diete hiru gazte oreretarrei nahiz Beasaingoari. Gainera, Petrirenak jakinarazi duenez, erantzukizun zibilik ez diete egotzi gazteei, hau da, egun horretan Iruñean izan ziren kalteen kargu ez dute egin behar.
Pozik, ondo jaso dute albistea gurasoek, nahiz eta desiatutako absoluzioa ez izan. “Zortzi hilabetez espetxean izan dira gure semeak. Eskatzen ziren zigorretatik erantzukizun zibila ere kendu dute, terrorismoarenaz gain. Ez dira berriz ere kartzelara sartuko, eta hori, dudarik gabe, ona da”.
Semearekin justu-justu hitz egiteko aukera izan du Petrirenak, “berria jakin duenetik gurekin hitz egin bitartean azterketa bat izan du unibertsitatean. Minutu batez hitz egin dugu soilik. Baina ongi, pozik”. Aldi berean, Etorkizunaren Alderen buru ziren beste auzipetuen gurasoekin mezu bidez hitz egin duela jakinarazi du Petrirenak, azkar batean, “oraindik guztiz kokatu gabe gaude”. Gaur arratsaldean dira biltzekoak, epaiaren balorazioa egiteko eta aurrera begirakoak adosteko.
Gaur ere Altsasuko gazteen gaineko epaia eman du Espainiako Auzitegi Nazionalak. Horren iritzia eman du Patxi Petrirenak: “Bidegabekeria handia iruditzen zaigu epaia. Nahiz eta terrorismoaren kalifikazioa kendu den, eta bada zerbait, epaia eta kondenak izurriak, neurrigabeak iruditzen zaizkigu”.
Lotutako albisteak:
