Energia kontsumo eraginkorraren aldeko tailerra egin dute
'Gipuzkoa Argitu'-ren bi saio egin dituzte Lezon; elektrizitate kontsumoaren datuak ezagutarazi dituzte, eta behera egin du
Gipuzkoa Argitu programaren barruan, bi saio egin zituzten pasa den astean, asteartea eta ostegunean, kultur aretoan. Gipuzkoako Foru Aldundiak eta Lezoko Udalak egitasmoaren berri eman zuten. Tailerraren helburua energia kontsumoaren datuak ezagutzeko eskubidearen berri ematea zen, eta hortik abiatuta, erabaki egokiak hartzeko laguntza eskaintzea.
Tailerra praktikoa eta interesgarria izan zela ziurtatu du Lezoko Udalak, eta parte hartzaileak gustura geratu zirela han entzundakoarekin. Besteak beste, energiaren merkatuaren nondik norakoak azaldu zituzten, baita fakturaren irakurketa ulertzeko argibideak ere.
Lezoko kontsumoa
Lezoko Udalak adierazi duenez, eurek ere eredugarri izan behar dute energia kontsumoaren murrizketan. Azken urteetan hainbat neurri hartu dituzte. Horrela, azalera urbanizatua handitu den arren, kontratutako potentziak, kontsumoak eta fakturazioak beherakada handia izan duela jakinarazi dute.
2011tik, kontrataturiko energiaren kopurua %32 murriztu da, fakturazioa %12 eta orduko kontsumitutako kilowattak %13. Gainera, ordutik hona, argiteria publikoaren kontsumoa %14 jaitsi da eta eraikin publikoena, berriz, %12.
Lezoko Udalak azaldu duenez, energia kontsumoa murrizteko helburuarekin eta eraginkortasunarekin hartutako konpromisoaren barruan kokatu behar da hori. Energia xahuketaz gain, udalak azaldu duenez, kostua bikoitza izango litzateke, eta ordaintzen denaren bikoitza ordaindu beharko litzateke. “Horrek eragina izango luke lezoarren poltsikoan ere”, ondorioztatu dute.
Ondoko esteketan klik eginda ikus daitezke kontsumoaren bilakaera, esparruz esparru: energia hornidura, argiteria, eraikin publikoak eta kontratutako Kw-k.
