EH Bildu, Errenteria Irabaziz eta EAJ alderdiek egin dute bat giza katearekin.
Mendoza, Karrikiri, Collar, Oiarbide, eta Ostolaza.
Erabakitzeko eskubidearen alde giza kate erraldoia egingo du Gure Esku Dago dinamikak igandean. Donostia, Bilbo eta Gasteiz hiriburuak erabakitzeko eskubidearen alde batuko ditu giza kate horrek, eta arrazoiez jantzi, zehazki, 2.019 arrazoiekin, 2019. urtea izango delako erabakitzeko urtea.
Giza kate horretan izango direla, erabaki nahi dutela esan dute gaur Errenteriako hautetsiek. EH Bildu, Errenteria Irabaziz eta EAJ alderdiek egin dute bat giza katearekin, eta haien izenean EH Bilduko Julen Mendoza alkatea, Itziar Ostolaza, eta Jaione Karrikiri; Irabazizeko Ion Collar; eta EAJko Garbiñe Oiarbidek azaldu dute beren alderdien atxikimendua.
2.000 lagun bildu behar ditu Errenteria-Oreretako Gure Esku Dagok, Itziar eta Zumaia arteko tartea lotzeko. Horren harira, oraindik ere izena eman ez duten herritarrei dei egin die dinamikak bat egin dezaten. Izena eman nahi dutenek, Gure Esku Dagoren lokalera jo beharko dute ostirala bitartean, 11:00etatik 13:00etara eta 16:00etatik 20:00etara.