Eskola Kiroleko ekintzetara joateko kutsatzen ez duten bidaiak egin dituztenek bere aitortza jaso dute gaur eguerdian, Elizalde Herri Eskolan.
Haizea Iartza eta Irati Palmak jaso dituzte, Elizalderen izenean, bizikletak.
Gaur goizean, Elizalde Herri Eskolan, Eskola Kirola eta iraunkortasuna batzen dituen ekitaldia egin dute. Izan ere, desplazamendu
berdeak aitortzeko sariak banatu dituzte. Eskola Kiroleko ekitaldietara oinez, bizikletan edo auto partekatuan joateari deitzen diote desplazamendu berdeak egitea.
Festa txiki bat egin dute, ikastetxeko jolastokian. Elizalde Dantza Taldekoek
Agurra dantzatu dute, lehendabizi, eta ondoren hasi da sari banaketa, Ibon Mendoza irakasleak gidatuta.
2017/2018 denboraldian bizikletan desplazamendu gehien egin dituen ikastetxeari bi bizikleta eman dizkiote. Elizalde Herri Eskola izan da, eta Haizea Iartzak eta Irati Palmak jaso dituzte. Beste sarietako bat patinete bat izan da, eta bizikletan bidai gehien egin dituen haurrari eman diote. Lezo Herri Eskolako Peio Munduateri eman diote. Desplazamendu
berde gehien egiten duen ikastetxea ere bai —Trintxerpeko Karmengo Ama— bizikleta batekin saritu ditu, eta ikastetxe horretako kuadrilla batek jaso du bizikleta.
Jardunaldietara modu
berdean joan direnen artean egindako zozketa egin dute, eta Orereta Ikastolako Mara Albisturrek Errenteria-Oreretako buelta bizikletan egiteko aukera izan du. Ekitaldia Elizalde Herri Eskolaren ereserkiarekin itxi baino lehen, bizikletan gutxienez behin mugitu diren Elizaldeko ikasle guztiei txirrindarako argitxo bat eman diete.
Sariak Ion Treku eta Arkaitz Angiozar Oiartzungo eta Lezoko Kirol teknikariek, Iñaki Pikabea Oiartzungo zinegotziak eta Eva Getaria Elizaldeko Eskola Kirolako koordinatzaileak banatu dituzte.
18.000 bidai
Oarsoaldeko Eskola Kiroleko eragileak asteartero biltzen dira, eta gaiarekin zerikusia duten hainbat alor aztertzen dituzte. Tartean dago mugikortasunarena.
2013/3014 ikasturtean desplazamendu iraunkorrak sustatzeko plan bat jarri zuten martxan. Helburua autoan, modu indibidualean, egindako desplazamenduak murriztea izan zen. Astebururo haurrak nola mugitu diren kontuan hartzen dituzte, eta data basea sortzen dute. Urtero 18.000 desplazamendu inguru egiten dira, eta berdeak aurten %49,57 izan dira. 2014/2015ean, kanpaina estreinakoz egin zenean, %44 izan ziren. Eskola Kirolaren arduradunak pozik daude ia erdia suposatzen dutelako, kontuan hartuta partida eta beste jarduera eremuek duten sakabanaketa.
Bizikleta desplazamenduak, berriz, asko hazi dira. Lehenengo urtean %2,36 izan ziren, eta aurten, berriz, %6,19 izan dira. Datorren urteetarako duten erronka kopuru hori handitzea izango da.
