Lartaun Txirrindularitza eta Kirol elkartearen presidente izan zen, eta Oiartzungo eta eskualdeko ziklismoa sustatu zuen
Joxe Mari Azurmendi, kaleko jantziekin, Pryca-Lartaun talde amateurra zuzendu zuenean (1990).
Joxe Mari Azurmendi San Pedro atzo hil zen, 73 urterekin. Txirrindularitzaren sustatzaile izan zen, bai Oiartzunen baita Oarsoaldean ere. Horrela, 2001era arte Lartaun Txirrindularitza eta Kirol Elkarteko presidente izan zen. Herriko ziklismozaleez gain, Errenteria-Oreretakoak eta Lezokoak jasotzen ditu Oiartzungo elkarteak.
Aitarengandik jaso zuen txirrindularitzarekiko zaletasuna, eta bere seme Iker, Unai eta Oroitzi transmititu zien.
Lartaungo presidente karguan bere lekukoa hartu zion Bibiano Arbelaitzek. Gertutik ezagutzen zuen, Arbelaitz zikloturista zenetik. “Zikloturismoa, eta txirrindularitza bere osotasunean hartuta, lan asko egin duen pertsona da, Oiartzunen baina baita Oarsoaldean ere. Bere garaian, Gazte Mailako eta afizionatuetako proiektu batzuetan ibili zen. Adibidez, Pryca-Lartaun taldearekin”, gogorarazi du.
Elkarteak urtero antolatzen duen Xanisteban Sariaren —71. ekitaldia izango du aurten— prestaketan buru belarri aritzen zen. Arbelaitz: “Presidente izan zenean, ez zen antolatzaile bakarra, baina bera ibiltzen zen batez ere”. Lasterketaren 50. ekitaldia —1998an— bere agintaldian suertatu zen, eta Abraham Olano gonbidatu zuten Oiartzunera bazkaltzera. Zortea emango zion, handik hilabete pasatxora Espainiako Itzulia irabazi baitzuen.
Suziria botatzen
Lartaungo kide bezala, Xanistebanetako Jai Batzordean parte hartu zuen, hainbat urtez. Arbelaitzek azaldu duenez, festen antolakuntzan egindako ibilbidea saritu zuten, eta 2007an xanistebanetako txupina bota zuen. Garai batean jubilatuen bazkaria antolatzen aritzen zen Mari Karmen Lekuonarekin partekatu zuen suziria botatzeko ardura.
Azurmendi Arantxa Madariaga Haurtzaro Ikastolako bi lehenengo andereñoetako baten senarra zen. Hezkuntzatik Oiartzuni egin dion ekarpenaz gain, txirrindularitzan ere eman zion berea. “Zikloturista denboraldia martxoan hasten zen, eta familiakoek egiten zuten hamaiketakoa”, azaldu du Arbelaitzek.
Azurmendiri gaur arratsaldean emango diote azkeneko agurra, 17:00etan, Oiartzungo beilatokian.
