Txosteko bi talde, aurrez aurre 22 urtez azpiko larruzko paleta finalean
Estefano eta Juaristi bikotea Leonet eta Erkiziaren kontra ariko dira ostiralean, Altzako frontoian
Ezker hormako larruzko paletako 22 urtez azpiko txapelketako finala ostiralean jokatuko dute. Eta bertan, Oiartzungo bi bikotek neurtuko dituzte indarrak, biak Txost pilota elkartekoak. Leonet eta Erkizia izango da bikoteetako bat, eta bestea Estefano eta Juaristik osatutakoa.
Sei bikotek hartu dute parte txapelketa horretan. Bi oiartzuarrez gain, Gazteleku klubeko beste bi, Realeko bat (erretiratu egin ziren arren) eta Altzatarrako beste bat izan dira parte hartzaileak. Azken klub horren etxean jokatuko dute finala, datorren ostiralean —hilak 22—, 17:45etik aurrera.
Lehenengo fasean elkarren aurka jokatu zuten, eta Estefano eta Juaristi nagusitu ziren. Markagailuko aldea, hala ere, txikia izan zen 35-30 gailendu baitziren. Ea nork irabazten duen ostiralean.
Esku huska, zaila
Esku Huskako Gipuzkoako Herriarteko Txapelketan, berriz, Oiartzunek oso zaila izango du aurrera egitea. Ostiral iluntzean egungo txapeldunaren kantxan jokatutako hiru partidak galdu zituzten. Honakoak izan ziren emaitzak: 22-16, kadeteetan; 22-19 Gazte Mailan; eta 22-9 seniorretan. Itzuliko partidak datorren ostiralean jokatuko dituzte, Madalensoron, 19:30etik aurrera. 
