Festen atarian oparo heldu da asteburua San Pedrora
Herri triatloia, Arraintxiki txapelketa, haurrentzako jarduerak, kirola eta kontzertuak... denetarik izango da aukeran.
Sanjoanen itzalera San Pedron hasi dira festetarako beroketetan. Hamaika ekitaldi antolatu dituzte sanpedrotarrek astebururako, askotarikoak.
Larunbatean, esaterako, goiz goizetik irtengo dira kalera. Lehenik arraintxiki txapelketara (08:30ean hasten da) eta ondoren, eguerdian, herri triatloian parte hartu edo animatzera (12:15).
Urteko gaurik motzena, nola ez, suaren bueltan ospatuko dute, Torrean. 21:30ean da bertan herri afaria, eta 23:00etan piztuko dute sua, Lamiak dantza taldeak girotuta.
San Juan Eguna, San Pedron handi
San Joan Eguna ere ospatuko dute aurten San Pedron. Haurrentzako ekitaldi ugari antolatu dituzte iganderako: Haurren eta nerabeen tratu onaren aldeko Busti zaitez lasterketa izango da goizean (11:00), eta 12:00etatik aurrera, Buztina eta Eskamak futbol partida klasikoak.
Kirol lehiak bukatuta, herri bazkarietarako txanda zabalduko da. Txikienentzat Antxeta elkartean, eta erretiratuentzat Nabarra Bou plazako karpan.
Haurren arratsaldea biribiltzeko, puzgarriak (16:00) eta ur festa (19:00) frontoian, eta Ertin disko festa (20:00).
Ez hain txikientzat, berriz, erritmo kubatarrak, Antxeta eta Begihaundi tabernek D’Capricho taldearekin antolatutako kontzertuari esker. 
