Hondakinen kudeaketa arduratsu eta jasangarriaren aldeko udalerrien elkartea da; tokiko erakundeen arteko koordinazioa izango du helburu
Atzo aurkeztu zuten elkartea, Hernaniko Orona Ideon-en.
Hobeki udalerrien elkartea aurkeztu zuten atzo, Hernanin. Hondakinen kudeaketa arduratsu eta jasangarriaren alde dauden tokiko erakundeek sortu dute elkarte hori. Oiartzun uztailean onartuko dute elkarteko kide gisa.
Atzoko aurkezpenean azaldu zutenez, hondakinen erabilera bizimoduaren isla da. “Herritarren bizimoldeak ez ezik, erakunde publikoen jokabideak ere nabarmen azaltzen dira”, gaineratu zuten.
Azaldu zutenez, hondakinen kudeaketarako ikuspegi ezberdinak daude Euskal Herrian, eta batzuetan kontrajarriak direla. “Ez dago hondakinen kudeaketarako politika antolaturik, herrialde bakoitzak bere era funtzionatzen du, eta etekin politiko eta ekonomikoa atera nahi zaio konpromiso soziala eskatzen duen gai bati”, esan zuten.
Horrela, gaur egungo legeriak hondakinen kudeaketa nolakoa izan behar duen argi uzten duela nabarmendu zuten, eta batzuetan praktika bestelakoa dela. Hobeki elkartean dauden toki erakundeek osasuna, ingurumena edo ekonomia zirkularra bezalako kontzeptuak modu zorrotzean aplikatzen dutela aldarrikatu dute.
Elkar harremana hobetzeko
Erakunde horien arteko komunikazioa eta esperientzia nahiz iritzi trukaketa behar bezalakoak ez zirela jakinarazi dute. “Hutsune hori betetzeko asmoz, elkarte bat eratzea deliberatu dugu: Hobeki”. Horrela, erakunde bakoitzak egiten duena beste erakundeei jakinarazteko asmoa dutela, ondorio zuzeneko iniziatibak denek partekatzeko.
Hobeki-ren helburuak elkarlana eta koordinazioa izango dira. Hori bai, hondakinen kudeaketa udalen eskumenekoa dela kontuan izango dutela iragarri zuten. Hobeki-ko kide diren —edota izango diren, Oiartzun bezala— tokiko erakundeek hondakinen kudeaketa ekologiko eta arduratsua egiteko konpromisoa dutela berretsi zuten.
Araba, Bizkaia eta Gipuzkoako lau udalerrik sortu zuten Hobeki: Hernanik, Larrabetzuk, Leintz-Gatzagak eta Donemiliagak. Pixkanaka batzen eta batuko dira beste hainbat udalerri: Segura, Zaldibia, Berastegi, Usurbil, Antzuola, Berriatua eta Oiartzun.
Webgunea eta konpromisoak
Elkartearen tresna nagusia
webgunea izango da, eta udalerri bakoitzak bere ekarpenak edo edukiak modu autonomoan igoko dituzte. Webgune horretan bertan,
Hobeki-ren printzipioen dekalogoa ikus daiteke.
Udalerri bakoitzak lau konpromiso hartuko dituela ere iragarri zuten. Lehena, elkartearen dekalogoko printzipioekin bat egiten dutela. Bigarrena, elkarteari udalerri bakoitzaren unean uneko informazioa ematea. Hirugarrena, hondakinen kudeaketarako plangintzak osatzea, elkartearen irizpideekin. Azkena, berriz, tratamendu finalistara joango den zatia ahalik eta txikiena izatea, eta zabortegi konbentzionalak edo errauste plantak ez diren tratamenduak hobestea.
