Chrysallis Euskal Herria elkarteko kide eta sexologoa den Aingeru Mayorrek emango du hitzaldia.
Elixebete Murua eta Jose Ignacio Irastorza gaurko agerraldian.
hitzaldia antolatu du Errenteriako EAJk datorren asteazkenean (hilak 27). Aste horretan, LGTBI pertsonen eskubideen aldeko nazioarteko eguna izango da hilaren 28an, eta egun bat aurretik antolatu du hitzaldia alderdi jeltzaleak. Gaiaren gaineko ezagutza zabaldu nahi dutela azaldu du Elixabete Muruak, Errenteriako EAJren lehendakariak, gaur alderdikide duen Jose Ignacio Irastorzarekin batera egin duen agerraldian: “Pertsona transexualek eta bereziki, haur eta nerabe transexualek, gure gizartean lasaitasunez eta normaltasunez bizitzeko duten eskubidea bermatzeko beharrezkoa baita ezagutzaren bidezko errespetua”.
Horretarako, gaiaren gaineko aditu bat izango da Reina aretoan,
Chrysallis Euskal Herria elkarteko kide eta sexologoa den Aingeru Mayor. Mayorrek, sexologo gisa duen ikuspegiaz gain, ikuspegi familiarra ere partekatuko duela azaldu du Muruak, “haur transexual baten aita da–eta”.Aurrera urratsak egin badira ere, oraindik orain, ekaina 28a bezalako aldarrikapen egunak beharrezkoak direla esan dute, “aldarrikapen honek, Martxoaren 8ak emakumeen kasuan egiten duen bezala, LGTBI kolektiboak jasaten dituen eskubide urraketekin amaitzeko eta erabateko berdintasuna lortzeko oraindik egiteko dagoen lana bistaratzeko balio baitu”.
LGTBI kolektiboaren borrokari aipamena egin dio Muruak, eta horrekin batera, gizarte osoaren borroka beharrezkoa dela gaineratu du, “gizarteak ez duelako bizi sexu identitate aniztasuna, sexu aniztasuna bizi duen adinako normaltasunarekin. Guztietan dago oraindik bidea egiteko, baino bide hori are luzeagoa da sexu identitate aniztasunaren kasuan”. Horren harira, transexualitatea ezagutzea eta ezagutzera ematea beharrezkoa dela esan du jeltzaleak, “ezagutzen ez dena ezin baita ulertu, eta ulertzen ez dugunarekin enpatia izatea zaila baita. bereziki garrantzitsua da hori haur eta nerabeen kasuan, bizitzan babes berezia behar dugun momentu horietan ulertuak izatea beharrezkoa baitugu gure nortasuna askatasunean garatzeko”.
Hitzaldia oso interesgarria eta aberasgarria izango dela gaineratu du Muruak, eta herritar guztiak deitu ditu parte hartzera. Hitzordua hilaren 27an, asteazkena, 19:00etan Reina aretoan.
