6.000 euroko fidantza ordainduta bortxatzaileak baldintzapean aske uzteko erabakiak "alarma guztiak piztu" ditu bozeramaile batzordearen esanetan.
Etsituta eta haserre azaldu da udala ‘La manada’-ko bostak baldintzapean aske aterako direlako.
Errenteriako Udaleko bozeramaile batzordeak adierazpen instituzionala egin du Nafarroako Auzitegiak
La manadako bost kideak baldintzapeko askatasunean uztea erabaki duela jakin ondoren. Erabateko “etsipena” eta “haserrea” azaldu ditu udalak erabakiaren inguruan, eta justizia eskatzen duen aldarriarekin bat egin du. Lehenik eta behin, babes, maitasun eta elkartasun osoa adierazi dio bortxatutako emakumeari, eta bere senide eta ingurukoei.
Gogora ekarri du, bestalde, sententziak jasotzen duenarekin erabateko desadostasuna azaldu zuela apirilean, “bereziki, jazotakoa sexu abusu jarraitu gisa aitortu duelako. Orain bi hilabete ateratako epaia okerra dela deritzogu. Epaia emakumeen eskubideen kontra doala irizten dugu, biktimaren errelatoari sinesgarritasuna kenduz, bortxaketaren errua botaz”.
6.000 euroko fidantza ordainduta bortxatzaileak baldintzapean aske uzteko erabakiak “alarma guztiak piztu” dituela gaineratu du adierazpen horretan bozeramaile batzordeak, eta ezinbestekotzat jo du sistema judizialak, bere osotasunean, berdintasun irizpideak eta begirada bere egitea. Horren harira, babesa erakutsi die sententzia inpugnatu zuten erakundeei, eta azken erabaki hau ere errekurritzera deitu ditu.
Emakume guztiek askatasunerako duten eskubidea aldarrikatu du, halaber, eta ozen adierazi du Errenteriako herriak ez duela inolako eraso matxistarik onartzen, baita berretsi ere udalak berdintasunaren alde lan egiteko duen konpromisoa, “mugimendu sozial, feminista, herritarrekin oro har eta bereziki, emakumeen eskubideen defentsan eta patriarkatuaren adierazpen ororen kontra”.
Auzitegiaren erabakia salatzeko deitutako elkarretaratzeekin bat egingo duela jakinarazi du, azkenik, eta horietara deitu ditu herritar guztiak.
Oreretako Asanblada feministak gaur 19:00etan deitu du elkarretaratzera epaitegiaren aurrean.
Adierazpen instituzionala hitzez hitz
