Osasun Pastorala taldea omenduko dute kultur ekitaldian

Zaharren egoitzara joan ohi dira, laguntza ematera eta bizitasuna eskaintzera; Oiartzungo Feministen Asanblada gonbidatu dute sokadantzara

Erik Gartzia Egaña

Oiartzun

2018/07/16

Zaharren egoitzara bisitak egiten dituzte.

Xanistebanak hurbiltzen ari dira, eta aleka ari dira ezagutarazten egitarauaren xehetasunak. Oraingoan, nor omenduko duten azaldu dute. Abuztuaren 1ean egingo da, urtero bezala, kultur ekitaldia. Osasun Pastoralako kideak omenduko dituzte. Orain dela 21 urte sortu zuten taldea, eta beren helburua Petra Lekuona zaharren egoitzan bizi direnei laguntza eskaintzea da, baita bizitasun pixka bat eramatea ere. Oiartzungo Udalak azaldu duenez, emakume horien lana ezagutaraztea da omenaldiaren helburua. Kontxi Erizek eta Koro Labandibarrek sortu zuten Osasun Pastorala taldetik emakume ugari pasatu dira. Gaur egun zortzi lagun inguru elkartzen dira, eta hamabost egunero bingoa antolatzen dute. Horrez gain, ekintza bereziak egiten dituzte: danborrada sansebastianetan, sanferminak, Aiton-amonen Astea irailean, irteerak eta abar. Eguberrian eta maiatzean etxez etxeko bisitak egiten dituzte. Sokadantzako gonbidatuak Xanistebanen hasieran egiten den sokadantzan parte hartzeko gonbidatu dituzte Oiartzungo Feministen Asanbladako kideak. Herrian egindako lana baloratu eta zoriontzeko asmoz hartuko dute parte abuztuaren 2ko ekitaldian. Bi kolektibo horiek, beraz, Arraguako Aldeguna elkarteari batuko zaizkie. Eurek botako dute txupinazoa, mende erdia bete dutelako aurten, besteak beste.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.