Sortu zutenetik, Ereintza Antzerki Taldeak ez du hutsik egin madalenetako egitarauan. Urtero, hilaren 23an, antzerki berezi bat eskaintzen dute. 20:00etan hasiko dira ‘Altxorra’ egiten.
Ereintza Antzerki Taldeko kideak.
Aurten, Ereintza elkarteak 60 urte beteko ditu. Ia-ia hasieratik, elkarteko antzerki taldeari esker, herriko dozenaka —ehunka ez badira— lagunek erakutsi dute euren aktore fazeta oholtza gainean. Urtez urte, gainera, belaunaldi berriak egitasmora atxikitzen joan dira. Sorreratik herriari euskarazko antzezlanak eskaintzea izan da haien asmoa, herritarrei madalenetako arratsalde dibertigarri eta ezberdin bat eskaintzeaz gain. Aurtengo saioa gaur da, 20:00etan —eta ez 19:00etan, HITZAk madalenetako gehigarrian publikatu bezala—, Niessen kulturgunean.
Altxorra du izena obrak.
Garai batean urtean zehar ere antzezlanak egiten zituzten arren, Madalen Jaietara mugatu dituzte emanaldi gehienak Ereintzakoek. 1990ko hamarkadara arte, «obra serioagoak» egiteko ohitura zutela kontatu du taldeko kide eta era berean gidoilari Luix Elizetxeak. Azken hamarkadetan, aldiz, komedia egiten aritu dira.
Taldean, adin tarte guztietako aktoreak daude. 50 urteko aldea dago aktore batzuen artean. Gazteenak 25 urte ditu; zaharrenak, berriz, 75 inguru.
Emanaldi berezia
Elkartearen urteurrena behar bezala ospatzeko
Altxorra ikuskizun berezia sortu dute aurten. Gaur ikusteko aukera izango dute herritarrek, Niessen kulturgunean.
«Oroimenean gordetako antzezlanak gogoraraztea da aurtengo helburua, ibilbide historiko laburra egitea», zehaztu du Elizetxeak. Horretarako, hainbat esketx landu dituzte, antzerki taldearen ibilbide guztiari erreferentzia egiten diotenak.
Horietako bat Mikel Ugalde errenteriarrak idatzi du, 1960ko hamarkadan girotua dago, eta frankismo garaian elkarteak pairatutako oztopo eta zentsuraren ingurukoa da; benetako gertaerak hartu ditu aintzat Ugaldek esketxa sortzeko. Hori bai, beti, umorea galdu gabe. Taldearen sortzaileetakoa da Ugalde.
Madalenetako antzerki emanaldi klasikoena 20:00etan hasiko da, eta sarrerak 3 euroan eskuratzeko aukera izango da, Niessengo leihatilan, astelehenean bertan.
Taldetik azaldu dutenez, gutxi gorabehera, ordubeteko iraupena du ikuskizunak. Jaietan, umorea landu behar delako, eta euskaraz bada, hobe.
