Ikasturteko azkeneko plenoa egin dute; xanistebanetako aurrekontua onartu du, beste hainbat gairen artean
EAJ abstenitu egin zen Hobekiren puntuan.
Atzo arratsean egin zuten ikasturteko azkeneko ohiko plenoa.
21 puntu aztertu zituzten, eta horietako batean, udalbatzak Euskaraldiarekin bat egitea onartu zuen. Azaro eta abendu artean egingo duten egitasmoari begira, konpromisoak hartzeko prest azaldu da udala, baita herritarrei bertara gonbidatzekoa ere.
Ioritz Aizpuru zinegotziak azaldu zuenez, Euskaraldiak ilusioa piztu du, baina euskarak konpromisoa behar duela gaineratu zuen, etorkizuna izan dezan. Aho batez onartu zuten proposamena.
Euskaraldia baino hurbilago daude xanistebanak, eta atzo onartu zuten festetarako aurrekontua. 98.293 euro bideratuko dituzte ekitaldietara, eta
udalaren webgunean ikus daiteke.
Herriko festekin lotuta, duela bi urteko lau ekitaldiren debekua jarri zuten mahai gainean.
Donostiako auzitegi batek debekatu zituen, eta udalak auzibidea hasi zuen. Epaitegiak ebatzi duenez, Oiartzungo Udalak ez zuela objektiboki jokatu. Jexux Leonet alkatearen arabera, egoera “jasangaitza” sortu zen xanisteban haietan. “Dirudienez, zerbaiten errudun gara, baina ez dakigu oso argi zerena”, gaineratu zuen. Epaiak ez du ondorio ekonomikorik ez bestelako zigorrik jaso.
Etxez etxeko zerbitzua eta Itturri
Etxez etxeko zerbitzua hobetzeko udalaren eta aldundiaren arteko hitzarmena ere onartu zuten. Horri esker, asteburuetan ere eskainiko dute zerbitzua, larrialdiak barneratzea eta erabiltzaileek ordaintzen duten tarifa merkatzea.
Zerbitzu horren %70 udalak finantzatzen du, %24 aldundiak eta erabiltzailearen gain geratzen da %6. Alkatearen esanetan, geroz eta oiartzuar gehiago daude horren beharra dutenak, eta horregatik, 2019rako diru partida handituko dute.
Bestalde, Itturri Merkatari Elkartearekin duten hitzarmenaren berri eman zuten.
Oiartzunen bizi, Oiartzunen erosi kanpainaren barruan, zozketak egingo dituzte, baita poltsak banatu ere.
Hobekiko kide
Oiartzun Hobeki elkarteko kide da, atzotik aurrera, eta Eneritz Arbelaitz izango da udalaren ordezkaria bertan. Tokiko erakundeen arteko elkartea da, hondakinak modu onean kudeatzeko irizpideak partekatzen dituena (
hemen irakur daitezke elkartearen helburuak).
“Oiartzunen HOBEKIren ideia orokorrak lehendik onartuak ditugu eta 2010etik praktikan jartzeko konpromisoak hartuak dauzkagu”, esan zuen Arbelaitzek.
Kide izatea, hala ere, ez zen aho batez onartu. EAJ abstenitu egin zen, eta Yon Goikoetxea zinegotziak azaldu zuenez, printzipio gehienekin ados egon arren, irizpide argirik ez dute.
