Politika Feministen I. Plana egiten hasi da udala

Urte bukaerarako diseinatzea aurreikusi dute, eta berdintasunaren arloko helburuak, lehentasunak eta esku hartzeak zehaztuko ditu

Erik Gartzia Egaña

Oiartzun

2018/07/26

Udaletxeko sailetan berdintasunaren ikuspegitik formatzen ari dira.

Oiartzungo Udala Politika Feministen I. Plana egiten ari da, eta urte bukaerarako diseinatuta egotea espero dute. Feminismo Saila ari da horretan lanean, eta berdintasun arloko helburuak, lehentasunak eta esku hartzeak zehaztuko dituzte. Planaren abiapuntua duela hamar urte egindako diagnosia izango da. Eguneratuko dute, eta udaleko sailetan genero berdintasunaren egoera aztertuko dute. Horrekin batera, Feminismo Saila udal barruan hainbat jarduera eta formazio tailer egiten ari da. Honakoak dira, besteak beste, lantzen ari direnak: eraso sexistei buruzko formazioa udaltzainekin; udaleku irekietako hezitzaileentzako hezkidetza tailerra; festa parekideen buruzko lanketa Xanistebanetako Jai Batzordearekin… Udaletxetik kanpora ere, beste hainbat ekintza egin dituzte, Oiartzungo Feministen Asanbladarekin elkarlanean. Autodefentsa tailerrak eta Sexu Askapenerako Eguna dira horren adibide. Udala, “eredugarri” Berdintasunaren arloko planak erakunde publiko guztiek izan behar dute, legeak hala aginduta. “Udalaren ardura da bere jardun osoan legea betetzea eta eredugarri izatea berdintasunaren arloan”, esan du udal erakundeak. Plan hori diseinatzeko 14.634,95 euro bideratuko dituzte. Emakundek %75 finantzatuko du.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.