Gazteek herri olinpiko egingo dute Lezo
Lezoko Gazte Asanbladak ekitaldiz bete ditu jaien aurreko egunak. Horren erakusle, irailaren 1ean eta 8an egingo diren Gazte Olinpiadak.
Lezoko Gazte Asanbladaren (LGA) ekimenez, Gazte Olinpiadak egingo dituzte Lezon irailaren 1ean (larunbatean) eta 8an. Ez nolanahikoak gainera. 10 taldek dute izena emanda horietan parte hartzeko, eta taldeen partaideen kopurua 8-10 artekoa denez, 16 urtetik gorako ia 100 gaztek astinduko dute herria bi larunbatez. Helburua, garbia: gazteen arteko harremanak indartzea, elkar ezagutzea, gozatzea, eta ongi pasatzea. Asko da hori. Eta noski, herriari ekarpen koloretsua egingo diote.
Larunbat honetako lehen jardunaldia bitan zatitu dute LGAko lagunek. Goizean, 10:30ean elkartuko dira taldeetako kideak Goiko Plazan, han jolasen lehen zatiarekin hasteko. Besteak beste, zapiaren jokoa (Lezorekin harremana duten galderen erantzunek emango dute zenbakia), txingak, sokatira, hanketan lotutako globoak eztandarazi, edo kutxekin aurrera egiteko jolasa egingo dituzte… Zailak ez dakigu, baina dibertigarriak bai izango direla lehen jardunaldiko jolasak. Arratsaldeko saioa 16:30ean hasiko da, Saldise plazan oraingoan.
Bigarren jardunaldia, irailaren 8an. Finalen eguna da. Bertara lehen jardunaldian hoberen ibili diren lau taldeak sailkatuko dira. Han erabakiko da zein taldek irabaziko duen.
Olinpiadak hasi aurretik, ostiral honetan, 19:00etan bilerara deitu ditu LGAk taldeetako ordezkariak, olinpiaden berri zehatz emateko eta zalantzak argitzeko (Saldise plazan). Ondoren, 20:00ak aldera, Tiñeluren eta Azkena tabernaren artean dagoen plazatxoan lehen beroketa ariketa egingo dute ia 100 partaideek, bertan, photocall-az gain, pintxoak dastatzeko aukera izango delarik. Kontuz mokaduekin, larunbatean gorputzak sasoiko egon behar duela.
LGA, eragile bizia
Aurtengoa ez da Gazte Olinpiaden lehen ekitaldia. Aurreko urteetan (iaz etenaldia izan zuten) ere egin dituzte, arrakastaz. Baina hori ez da LGAk esku artean duen bizigarri bakarra. Adibidez, Hiltzailearen Jokoa izenekoa egingo dute irailaren 7tik 16ra. Sartu LGAren Facebook atarian horren berri zehatza izateko.
Gainera, uztailean zehar 3x3ko saskibaloi txapelketa, edo brillet partida egin dituzte. Hori bakarrik ez: asteartetan zine emanaldiez gozatzeko aukera izan dute gazteek, eta nahi zuten guztiek, herriko gazteei esker.
Santakrutzak epel datoz. Berotasun horren erantzule nagusietako bat, Lezoko Gazte Asanblada.
Lezoko Gazte Olinpiadak Goiko Plazan hasiko dira irailaren 1ean (larunbatean).
