Haurrak mozorroturik eta jolasean San Pedroko ludotekan.
Indarberrituta ekingo diote aurtengo ikasturteari Pasaiako hiru udal ludotekek. Irudi korporatibo berria sortu dute, barruti guztietan irudi berbera erabiltzeko komunikazio euskarri guztietan. Horrez gain, Antxoko barrutian hirugarren hezitzaile batez indartuko dute zerbitzua, udalak azaldu duenez, “ludoteka horretara joaten den haur kopuru handiari dedikazioa eta arreta handiagoa eskaini ahal izateko”.
Ludoteken logo berria
Ikasturtea urriaren 1ean hasiko da, baina aurretik matrikulazio epea zabalduko dute, zehazki irailaren 17tik 28ra bitartean. Interesdunek
udalaren webgunean lor dezakete matrikulazio orria, eta Pasaian biziz gero, etxean jaso, udalak adin tarte horretako seme-alabek dituzten famili guztiei igorriko dielako ohiko postaz.
Ludoteken zerbitzua 4 eta 12 urte arteko haurrei zuzenduta dago, eta ikasturte osorako matrikulak 56,20 euro balio du. Matrikulazioa behin betikoa izateko, izen-emate epea bitartean ordainagiria dagokion ludotekan aurkeztu beharko da.
Ludotekak ekainera arte egongo dira irekita, astelehenetik ostiralera 17:00etatik 18:30era txikienentzat (4-8 urte) eta 18:30etik 20:00etara handienentzat (8-12 urte) aste barruan. Larunbatetan 11:00etatik 13:00etara irekiko dituzte adin guztietakoentzat.
Zerbitzuak oso harrera ona izaten du pasaitarren artean. Azken ikasturtean 350 haur inguruk izena eman zuten. Jolas librea ardatz, ludotekek lagun berriak egiteko, euskara indartzeko, eta irudimena bizkortzeko aukera eskaintzen die txikienei.
Informazio gehiagorako:
- Trintxerpe-San Pedroko ludoteka: Espinosa de los Monteros kalean, Arrantzaleen auzoan.
Tlf: 943 392 510.
- Donibaneko ludoteka: herri eskola zaharrean, J. J. Otaegi plazan; Tlf: 943 517 290.
- Antxoko Ludoteka: Gure Zumardian, Azoka eraikinean. Tlf: 943 248 512.
