Etorri berrientzat hastapeneko euskara eskolak dira. 60 orduko iraupena izango du ikastaroak.
AISA egitasmoko eskolak urrian hasiko dituzte.
Euskal Herri kanpotik heldutakoei euskara oinarriak modu errazean irakasteko programa da AISA, eta aurten ere Oarsoaldeko Euskara Batzordeak eskainiko ditu Oarsoaldeko lau udalerrietan udal euskaltegiekin eta AEKren euskaltegiekin elkarlanean. Etorri berrientzat hastapeneko euskara eskolak dira, eta munduko gainerako herrietatik etorri berri diren eta Errenteria-Orereta,Oiartzun, Pasaia eta Lezon erroldatuta dauden 16 urtetik gorako herritarrei zuzenduta dago.
Laburra izango da ikastaroa, 60 ordukoa, eta urriaren 1ean hasi eta urtarrilaren 31n bukatuko da. Eskolak, astean lau orduz emango dituzte. Astean bi orduko bi saio edo larunbat goizetan lau orduko saio egiteko aukera izango dute parte hartzen dutenek ikastaroan. Eskolak berriz, Oarsoaldeko udal euskaltegietan eta AEKren euskaltegietan emango dira, baina lekua aldatzeko aukera ere izango da.
Ikastaroak 5 euro balio ditu, eta matrikularen kostuari aurre egiteko laguntzei buruzko informazioa eskatzeko gomendatu dute antolatzaileek. Ikastaroan parte hartzen dutenen artetik aprobetxamendu egokia egiten dutenek ikastaroa egin izanaren agiria jasoko dute ikasturte amaieran.
Izena emateko epea astelehenean (irailak 3) zabalduko dute eta 21era arte izango dute aukera interesdunek ikastaroarekin bat egiteko. Horretarako honakoetara jo behar dute:
- Errenteria-Oreretan: Errenteriako Euskara Zerbitzua, 943 44 96 13 (Herriko enparantza z/g).
- Lezon: Lezoko Euskara Zerbitzua, 943 51 34 76 (Donibane kalea, 2).
- Oiartzunen: Oiartzungo Euskara Zerbitzua, 943 49 38 42 (Fermiñene Etxea, Aialde, 2).
- Pasaian: HAZ, Herritarren ArretaZerbitzua 943 34 40 34; Donibanen, Donibane kalea 19an; Trintxerpen, Alkateordetzan (Euskadi Etorbidea z/g); Antxon, Hamarretxeta kalea 24an.
