Gipuzkoako Garraio Zentroaren zati bat, Oiartzunen

2020rako egina nahi du Gipuzkoako Foru Aldundiak zentroa. Orotara 190 kamioirentzako tokia izango du, egun dagoen gunea egokituta.

Urko Etxebeste

Oiartzun

2018/08/31

Horrela geldituko da garraio zentro berria.

Gipuzkoako Foru Aldundiak jakinarazi du Gipuzkoako Garraio Zentroa egingo dutela herrialdean, bi gunetan: bat Oiartzunen egongo da (Donostiarako noranzkoan), bestea Astigarragan (Irunerako noranzkoan). Biak AP-8 autobidean izango dira. 2020 urtearen erdialdera martxan izango dira. Bidegiren bitartez egingo dituzte lanak, 11,2 milioiko aurrekontuarekin (BEZa erantsi behar zaio). Aldundiak zehaztu duenez, Espainiako Estatuko handiena izango da, eta segurtasun maila handiena izango du. Oiartzungo gunea egungo zerbitzu gunean eraikiko dute, hori egokituko dute. 190 kamioirentzako tokia izango du, eta hainbat zerbitzu eskainiko dizkie, Astigarragakoa bezala, kamioi gidariei: jatetxea eta kafetegia, supermerkatua, komunak eta dutxak, telebista aretoa edo aisia eremua, eta garbitegia, Wifia, kutxazain automatikoa, informatika eta admistrazio zerbitzua, takografoa deskargatzeko sistema eta bestelakoak ere izango dira. Ingurumena errespetatzen duten erregaiak erabiltzen dituzten ibilgailuek gune bereziak izango dituzte. Garraio azpiegituraren helburua da batetik kamioien trafikoa arintzea AP-8ko ilarak kentze aldera, eta aldi berean kamioilariei zerbitzu ona ematea.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.