Ordiziako Euskal Jaietan ere, Katerin Artola txapeldun
Beñat Salegi errenteriarrak bigarren postua eskuratu du aurresku txapelketan; lehenengo aldiz aurresku txapelketa mistoa izan da
Katerin Artola Ordizian ere bai nagusitu da.
Aurten lehenengo aldiz, Euskadiko Gipuzkoar Aurresku Txapelketa eta Euskadiko soinu zahar txapelketa bateratu eta, partaidetza mistoa izan duen txapelketa jokatu zuten.
Guztira zortzi dantzari lehian aritu ziren: Nahia Lopez (Legazpi), Iker Belintxon (Lezo), Beñat Salegi (Errenteria-Orereta), Idoia Narbaiza (Legazpi), Elixabet Larrañaga (Villabona), Asier Rios (Errenteria-Orereta), Katerin Artola (Oiartzun) eta Irati Olaizola (Legazpi). Epaimahaia Jose Luis Vallejok, Nahikari Vizuetek eta Izar Etxeberriak osatu zuten.
Dantzariek, Ordiziako txistularien eta Aitor Furundarena akordeiolaren laguntzaz, Aurkez aurke (desafioa), soinu zaharra bat (dantzariek Ehun dukat, Ehun ta bikoa eta Graziana-ren artean dantzari bakoitzak aukeratu duena) eta Zortzikoa eskaini behar izan dituzte.
Sariak
Epaimahaiak deliberatu zuenaren harira, Katerin Artolak honako sari hauek jaso zituen: Gipuzkoako Euskal Dantzarien biltzarreko trofeoa, Ordiziako Udaletxeak eskainitako trofeoa, txapela, 400 euro eta gazta bat eskuratzeaz gain, Patxi Epelde eskulturgilearen lana jaso zuen. Hurrengo edizioa ospatu arte bere herriko udaletxean gordeta izatearen ohorea lortu du.
Bigarren saria berriz Errenteria-Oreretako Beñat Salegirentzat izan zen eta honek udalak eskainitako trofeoa, 300 euro eta gazta bat eraman zituen etxera.
Irati Olaizola legazpiarrak hirugarren Saria lortu zuen eta udalak eskainitako trofeoa, 200 euro eta gazta bat jaso zituen.
