Familia ugarien Hirukide elkartea aurkeztuko dute bihar
Udaletxeko areto nagusian aurkeztuko dute elkartea; hiru seme-alaba dituzten familiak ez ezik, beste mota batzuetakoak ere sartzen dira
Hirukide familia ugarien elkarteak aurkezpen ekitaldia egingo du bihar arratsaldean, udaletxeko areto nagusian. Bertan, elkartearen lana zein den azalduko dute, baita familia ugari direnen iritzi eta proposamenak entzun ere.
Ibai Arberas Hirukide elkarteko kideak Oiartzun Irratiari azaldu dionez, familia ugariak hiru seme-alaba dituzten familiak dira. Baina ez horiek bakarrik: bi seme-alaba dituzten familiak sar daitezke, horietako batek elbarritasunik badu edo guraso alarguna baldin badute.
Euskal Autonomia Erkidegoan 25.000 familia dira ugariak. Horien herena —8.300— dira bazkide. Elkarteak aholkuak eta informazioa ematen dizkiete kide diren familiei, eta hainbat komertzio eta enpresekin hitzarmenak sinatuta dituzte, produktuak merkeago eskuratzeko. Bestalde, pasa den larunbatean hogeigarren festa egin zuen elkarteak. 
