Pasaiako Udalbatzak Euskaraldia babestu eta bultzatuko du
Adierazpen bateratua egin dute Pasaiako Udalean ordezkaritza dute talde guztiek.
Euskaraldia atxikimenduak biltzen hasi da, eta Pasaian, zerrendan lehena, Udalbatzarena. Gaur eguerdian agertu dira prentsa aurrera udalean ordezkaritza duten talde guztiak, elkarrekin, Euskaraldia babestera.
Izaskun Gomez alkateak eman dio hasiera prentsaurrekoari, eta irakurketa gaztelaniaz egin badu ere, euskaraz bukatu du bere mintzaldia, euskara ikasten hasi dela iragarriz, eta herritarrak bide bera hartzera animatuz. “Ni hasia naiz bide hori jorratzen eta gainontzeko pasaitarrak ere animatu nahi ditut”, esan du alkateak Pasaian euskararen erabilera bultzatu beharra dagoela baietsi ondoren.
Erabilera bultzatu, ulermenari garrantzia eman
Agerraldian euskarak Pasaian bizi duen egoeraren berri eman dute, datu batzuk nabarmenduz. Esan dutenez, ezagutzak nabarmen gora egin duen arren, erabilera ez da neurri berean hazi.
2016. urtean egindako VI. Inkesta Soziolinguistikoaren arabera, Pasaian bizi den 2 urte edo gehiagoko biztanleriaren %43,17 euskalduna da eta biztanleen %63,48 euskara ulertzen du. Erabilerari erreparatuz gero, ordea, Pasaiako 15 urtetik gorakoen artean soilik %15,75ek hitz egiten dute euskaraz.
Datuen irakurketa eginda “euskara inflexio puntu batean” dagoela defendatu dute, eta aurrerantzean landu beharreko bi lan ildo nabarmendu dituzte: erabilera bultzatu, eta horretarako ulermenari garrantzia eman, “euskara ulertzeak euskaraz hitz egin nahi dutenei bidea irekitzea” ekarriko duelakoan.
Euskara zinegotzi Nahikari Oterminek, bere aldetik, udalak Euskaraldia sustatzeko hartutako konpromisoen berri eman du eta, besteak beste, udalaren barruan ahalik eta Ahobizi eta Belarriprest gehien lortzeko ahalegina egingo dutela iragarri du.
Oposizioko taldeetako bozeramaileak ere mintzatu dira. Pasaiak Ahal Du-ren izenean Nerea Gonzalez Bastardok herritarrak Euskaraldian parte hartzera deitu eta euskararen erabilera bultzatzea eskatu du, eta EH Bilduren izenean Migel Mari Torreak hizkuntza ohiturak aldatuz euskararen erabilera indartzeko beharra berretsi du.
Tokiak tokiko dinamikak
Bihartik aurrera egongo da zabalik Euskaraldian online izena emateko epea. Euskararen aldeko iniziatiba hau tokian tokiko eragileak ari dira bultzatzen. Pasaian Euskaraldiak talde propioa du, eta Antxon, esaterako, gaur bertan dute bilera, besteak beste barrutiko hamaikakoa osatu eta aurkezpena prestatzeko. 18:00etan da batzarra, kultur etxean.
Pasaiako Euskaraldiaren aurkezpen orokorra hilaren 12an egin zen Donibanen, eta urria hasieran barrutikako aurkezpenak izango dira.
Online ez ezik, herriko HAZ bulegoetan eta liburutegietan eman daiteke izena.
