Oiartzungo Udalak Euskaraldiarekin bat egin du

Udalbatza osoak bat egin du Euskaraldiarekin; "erantzukizunez eta eredugarritasunez" jokatuko dutela esan dute

2018/09/21

Udalbatzako kideak, uztaileko plenoan.

Asteazkenean Euskaraldia aurkeztu zuten Oiartzunen, eta pixkanaka ari dira atxikimenduen berri ematen. Oiartzungo Udala da horietako bat. Pasa den uztaileko plenoan onartu zuten Euskaraldiarekin bat egitea, eta oiartzuar guztiak gonbidatu dituzte gauza bera egin dezaten. Udalak gogorarazi duenez, euskararen ezagutza hazten ari da Euskal Herrian, bai hiztunen aldetik baita ulertzeko gai direnen aldetik ere. Oiartzungo biztanleen %76,25 euskalduna da eta %11,18k ulertzen du. Udalari dagokionez, hautetsi guztiak dira euskaraz hitz egiteko gai, eta udaleko langileak ere bai. Oiartzungo erabilera datua %58,8 da. “Badugu non hobetu”, esan du udalak, “eta horretan lagunduko ditu Euskaraldiak. Oiartzunen erabileran eragiteko baldintza soziolinguistiko egokiak ditugu. Horrek ardura eta erantzukizun berezia ematen digu Euskaraldian”. Horregatik, Oiartzungo Udalbatzak konpromiso hauek hartu ditu:

Oiartzungo udalbatzak bat egiten du Euskaraldiarekin eta ekimenaren sustatzaile izango da. Erantzukizunez eta eredugarritasunez jokatzeko konpromisoa hartzen du.
Ordezkari politikoon egiteko nagusia izango da Euskaraldiaren markoan eta, bereziki, udal barruan ekimena zabaltzea. Ekimen honetan ahalik eta ahobizi eta belarriprest gehien aktibatzeko urratsak emango ditugu, arduradun politikoak izan edo langileak izan.
Ahobiziok euskara ulertzen duten guztiekin euskaraz aritzeko konpromisoa hartzen dugu.
Belarriprestok gainerakoak gonbidatuko ditugu gurekin euskaraz egin dezaten, nahiz eta guk euskaraz edo gaztelaniaz erantzun.
Oiartzungo Udalak neurriak hartuko ditu hizkuntza-praktika horiek posible izan daitezen eta praktika horiei etorkizunean eutsi ahal izateko.
Oiartzungo Udalak, udal barruan ez ezik udalerrian ere, ekimenaren sustatzaile gisa, herritarrak gonbidatuko ditu Euskaraldiko ekimenetan parte har dezaten eta izena emateko bideak erraztuko ditu.
Oiartzungo Udalak bat egiten du ekimena Gipuzkoan elkarrekin, elkarlanean eta batera garatzearekin, lurralde mailako politika bateratu bati begira, ahalik eta udal gehienetan, mankomunitateetan, Gipuzkoako Foru Aldundian eta Gipuzkoako Batzar Nagusietan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.