Hizkuntza gutxituen kooperazioan jarraitzeko hitzarmena berritu dute

Oiartzungo Udalak eta Garabidek duten hitzarmena lau urterako berritu dute; hizkuntza minoritzatuen titulua duten hemeretzi lagunek Oiartzunen pasako dute asteburua

Erik Gartzia

Oiartzun

2018/09/28

Leonet eta Abarrategi, hitzarmena sinatzen.

Oiartzungo Udalak eta Garabidek hitzarmena berritu dute gaur eguerdian, hizkuntza gutxituen kooperaziorako elkarlanean jarraitzeko. Lau urterako du indarra hitzarmen berri horrek. Jexux Leonet alkateak eta Txema Abarrategik, hizkuntza gutxituen kooperazioan aritzen den elkarteko ordezkariak, sinatu dute. Ez dira udaletxeko areto nagusian presente zeuden bakarrak. Garabideren Hizkuntza Biziberritzeko Aditu Tituluaren ikasketak egitera etorritako hemeretzi lagunak izan dira bertan. Asteburua Oiartzunen pasatuko dute, eta haiei harrera egin diete Leonetek eta Domi Azpiroz zinegotziak. Bederatzi herrialdetatik etorritakoak dira: Bolivia, Brasil, Ekuador, Guatemala, Kolonbia, Kurdistan, Maroko, Mexiko eta Wallmapu. Jatorrizko hizkuntza komunitateak, aldiz, gehiago dira: hamabi. Honakoak dira haien ama-hizkuntzak: guarania; kashinawa; ketxia; kitxea; kitxua; kaqchikela; nasa; kurdua; amazigha; nahuatla; maia eta maputxea. Euren komunitatean aktiboak diren pertsonak dira titulua atera nahian dabiltzanak. Komunikabideetan edo hezkuntza bezalako arloetan egiten dute lan, edo aktibista eta ordezkari politikoak dira. Udalak egonaldi probetxugarria opatu die.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.