[Bideoa eta galeria] Guztiontzako mundua eraikitzen hasi dira Errenterian

Bizipoza elkartea osatzen duten elkarte guztien lana ezagutarazi eta mundua denentzet behar duela aldarrikatzen ari dira jaiaren bidez.

2018/09/29

Ikerne Zarate

Bizipozaren Jaiaren barruan txikienek erruz gozatu dute Pirritx, Porrotx eta Marimototsen emanaldiarekin.

Bizipozaren Jaiak hartu du Errenteria-Orereta. Goiz goizetik Bizipoza elkartea osatzen duten izaera bereziko 33 elkarteek Zumardiaren pareko errepidea hartu dute beren postuekin. Lehen eskutik azaltzen ari dira bertaratzen direnei egiten duten lana, ez nolanahikoa. Jaiaren atzean Bizipoza osatzen duten elkartea guztiak, boluntario andana, eta batez ere Errenteria-Oreretako Mindara eta Juneren Hegoak elkarteak, jaiaren antolatzaileak aurten. Gernika plazan puzgarriak eta tailerrak antolatu dituzte eta haiekin gozatzeko aukera izango da egun guztian zehar. Mindarako boluntarioek berriz, kirol egokituaren gaineko azalpenak ematen ari dira bertaratzen diren guztiei, baita hura probatzeko aukera eskaintzen, aulki gurpildunetan, edota begiak estalita. Helburu hori du jaiak, ezagutaraztea elkarte hauek guztiek egiten duten lana, pertsona guztiak ezberdinak direla, ezberdintasun hori aniztasun dela, eta munduak aniztasun horrentzat guztiarentzat lekua izan behar duela. Martinber, Tiritatxo, Marikalanbre, eta Ane Pirata lehen ordutik dabiltza kalean, piko piko jolasean parte hartzen ari diren familiei laguntzen, eta eskatzen dien ororekin argazkiak egiten. Zumardian ekitaldirik jendetsuena momentuz, Pirritx, Porrotx eta Marimototxen ikuskizuna. Agirre Lehendakariaren plazan 800 lagunentzako lekua atondu dute, eta lepo dago karpa. 13:15ean ongi etorri ekitaldia egingo dute Zumardian, eta ondoren, Merkatuzarrek 1.000 lagunentzako bazkaria hartuko du, bi txandatan. Egunosoan zehar hamaika ekintzez gozatzeko aukera dago, aniztasunean. Errenteria-Orereta, Bizipoza da. Egitaraua

Zumardian, elkartasun gunean 10:00-16:00. Bizipozako elkarteen standak bisitatzeko aukera. 10:00. Familientzako Piko-Piko jolasa Irrien Lagunak taldeko pertsonaiek lagunduta. Egunean zehar. Albaolako Itsas Kultur Faktoriako lagunak.
Zumardian, irria gunean 11:45. Pirritx, Porrotx eta Marimotots. Saioaren bukaeran Furiusekin Egin zaidazu bisita kanta eta dantza. 16:00. Go!azen telesaileko lagunen ikuskizuna eta photocall-a. 17:00. Irrien Lagunak-ekin parrandan eta txokolate jatea.
Zumardian, tximeleta gunean 13:15. Ongietorri ekitaldia. 13:30. Concha Rociera eta Jon Maia bertsolaria. 15:00. Mindarako haurren ikuskizuna. 15:15. Kale Dor Kayikorekin palmak eta kajoiak jotzeko aukera.
Gernika plazan, ezberdin berdinak gunea Puzgarriak eta tailerrak. Antolatzaileak: Oarsoirriak, Real Sociedad Fundazioa, Gipuzkoa Basket Saskibaloi Taldea, Mindara Kirol Egokitua, Arteliburu21, Musikhazi, Juneren Hegoak, Bihotzez elkartea, Beti Prest.
Merkatuzar eraikinean Bazkaria. Bi txanda: 13:30ean eta 15:00etan bigarrena. Sarrerak, 5 euroan, Xenpelar Kultur Dendan, Keralan eta Arkaitzan.

Elkarteak

Adegmi. Gipuzkoako Esklerosi Anizkoitza Elkartea.
Afestta. Tourette sindromea eta bestelako trastornoen Euskadiko familia elkartea.
Agipase. Gipuzkoako Guraso Bananduen elkartea.
AMPGYL. Lesbiana, Gay, Transexual eta Bisexualen guraso elkartea.
Arnasa. Fibrosi kistikoaren elkarte gipuzkoarra.
ASPANIF. Erbi ezpaindun edo ahosabai hautsidun haurren gurasoen elkartea.
ASPANOGI. Gipuzkoako haur minbizidunen gurasoen elkartea.
Aspanovas. Bizkaiko minbizidun haurren gurasoen elkartea.
Aurrera atera. Animalien laguntzazko terapiaren bidez bazterturiko kolektiboak laguntzeko elkartea.
Banaiz Bagara. Elkarrekin euskaraz bizitzeko egitasmoak
Beroa. Gipuzkoako Harrera Familien Elkartea.
Bihotzez. Kardiopatiak dituzten haurren familien elkartea.
Boclan Biak Bat Fundazioa. Elbarritasun bat duten lagunei eta gizartean bazterturik geratzeko arriskua dutenei laguntzeko txakurrak hezten ditu.
Txernobilen lagunak. Ukrainako Doviria gizarte etxearekin lan egiten duen Gipuzkoako elkartea.
Etiopia Utopia Fundazioa. Tigray eskualdean (Etiopia), garapenerako lankidetzan laguntzeko elkartea.
Chrysallis. Batzuetan pertsona baten sexua ez dator bat jaiotzean genitalen arabera ezarritako sexuarekin. Badira zakila duten neskak eta alua duten mutilak. Haien alde dabil lanean elkartea.
Dravet. Sendabiderik gabeko Dravet sindromea haurrei eragiten dien epilepsia mota larria duten haurren familiei laguntzeko elkartea.
Down sindrome elkartea. Adimen urritasuna duten pertsonen bizi kalitatea hobetzeko elkartea
Gehitu. Euskal Herriko Gay, Lesbiana, Transexual eta Bisexualen Elkartea.
GKEF. Kirol egokituaren sustapena eta antolaketa Gipuzkoan.
Gizakien Lurra. Laguntza zuzena babesik gabeko haurrei.
Gure Nahia Elkartasuna. Gaixotasun arraroak dituzten haurren aldeko Gipuzkoako elkartea.
Hiru hamabi. Garuneko kaltea jasan duten adin txikikoen familien elkartea.
Gure Señeak. Gaixotasun arraroak dituzten haurren familiei sostengua emateko elkartea.
Juneren Hegoak. Seme-alabaren bat gaixorik duen eta egoera zaurgarrian dauden familiei laguntzeko elkartea.
Kale Dor Kayiko. Ijitoek ijito ez direnek dituzten eskubide eta aukera berdinak izateko lan egiten du elkarteak.
Mindara. Dibertsitate funtzionala duten pertsonak artatzeko Gipuzkoako elkartea.
Pausoka. Behar bereziak dituzten haurren gurasoen elkartea.
Sahararen Aldeko Goierriko Lagunak. Saharako herriaren alde lan egiten duen elkartea.
Vass, Sanfilippo Euskadi. Sanfilippo Sindromedun Umeen Euskal Elkartea.
Seaskako integrazio batzordea. Ahalmen urriko haurren eskolatzea sustatzen du ikastoletan.
Ume Alaia. Adopzio familien elkartea.
Ulertuz. Entzumen urritasuna duten neska-mutilei laguntzeko elkartea.
Super H. Gaitz arraro eta onkologikoen ikerketan laguntzeko elkartea.

Azken berriak

Harpidetu zaitez gure buletin irekira!
Asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.

Pribatutasun Politika irakurri eta onartzen dut.

Harpidetu

Datuak ondo jaso dira. Eskerrik asko.

Izen-abizenak eta posta elektronikoa sartu behar dira.

Posta elektronikoak ez du formatu zuzena.

Arazo bat gertatu da eta ezin izan da izena eman. Jarri gurekin harremanetan mesedez eta barkatu eragozpenak (Akatsaren kodea:).

Oarsoaldeari buruzko kalitatezko informazioa eta gertukoa jaso nahi dudalako. Euskaraz bizi nahi dudalako eta hizkuntzaren biziberritzea bultzatu nahi dudalako.Herrigintza egin nahi dudalako.Oarsoaldeko euskarazko komunitatearen parte izan nahi dudalako. Oarsoaldeko herritarrok behar dugulako.