Garagardoz, opariz, kafez eta giroz gainezka dator XIV. Garagardo Festa

Hemerzortzi garagardo moten artean aukeratu ahal izango da hilaren 10etik 13ra Done Eztebe plazan; herriko zazpi tabernak 500 kafe banatuko dituzte

Erik Gartzia Egaña

Oiartzun

2018/10/04

Hilaren 10etik 13ra Oiartzun ‘Munich Txiki’ bat bihurtuko da.

Urriaren erdialdean herriko garagardozaleek zita ekidinezina dute. Oiartzungo Garagardo Festa hamalaugarren aldiz ospatuko dute, hilaren 10etik 13ra, Done Eztebe plazan. Protagonista nagusia, ezbairik gabe, garagardoa izango da: hemezortzi iturri egongo dira, mota askotako garagardoak zerbitzatu zain. Antolatzaileek, aurten, Kataluniari keinu egin diote, eta bertako bi garagardo hurbilaraziko dituzte Oiartzunera [hemen ikus daitezke hemezortziak, beren ezaugarriekin]. Horrez gain, ohiko menua ere eskainiko dute. Postretarako, aurten, kafea egongo da: herriko zazpi tabernak 500 kaferentzako tiketak eman dizkiete festaren antolatzaileei, jan eta edatera doazenen artean banatzeko. 19:00etan irekiko dute eremua, eta 01:00a arte egongo da bertan egoteko aukera. Ostegunean, berriz, pintxopotea pintxo-prost bilakatuko da. Opariak eta ekitaldiak Festa, hala ere, ez da jan eta edanera bakarrik mugatuko. Egunero 22:00etatik 23:00etatik zozketak egingo dituzte —euro batean salduko dituzte txartelak—, eta 60 sari egongo dira jokoan, herriko merkatarien eta ostalarien laguntzarekin: hogei gosari, arrain loteak, 28 afari, termatarako sei bonu, hainbat produktuk osatutako hamahiru lote, nekazaletxetan bi gau eta lau masaje. Gainera, larunbatean, Urkabeko Igoerak eta Garagardo Festak bat egingo dute. Haurrekin ez dira ahaztu: egun horretan, beraientzako puzgarriak eta txokolate jatea egongo dira.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.