Badian Bizi plataformak bilera irekia egingo du Antxon
Plataformaren helburuak azaldu eta orain arteko lanaren berri emango dute; parte hartzera deitu dute, 12:00etan, larunbatean (hilak 27), kultur etxean.
Udan jaio zen Badian Bizi plataforma, abuztuan Lezoko kaian izan zen sutearen ondoren. Plataforman, Lezo, Errenteria-Orereta eta Pasaiako bizilagunak elkartu dira “ingurumenarekiko eta inguruko bizilagunekiko errespetuz jokatuko duen portua eskatzeko”, eta orain plataforma aurkezteko batzarra egiteari ekin diote, herriz-herri. Lehen batzarra Antxon izango da, larunbatean (hilak 27), 12:00etan, kultur etxean.
Badian Bizik adierazi duenez, batzarraren helburua bikoitza da: “batetik, plataformaren helburuak azaltzea; bestetik, abuztuaren 2an portuan gertaturiko sutearen ondorioz sortu zenetik Badian Bizik egin duen lana ezagutzera ematea”.
Portua beharrezkotzat jotzen dutela argitu du Badian Bizik, baina non dagoen aintzat hartu eta portua eta herrien arteko elkarbizitza bermatze aldera neurriak hartu ditzala eskatzen diote azpiegituraren zuzendaritzari.
Herritarrak batzarrera deitu dituzte, eta bere proposamenak eraman eta partekatzera animatu dituzte, “abuztuaren 2ko bezalako gertakariak errepika ez daitezen”. Izan ere, plataformaren ustez, pertsonen bizi kalitatea bermatuko dituen portu-hiria lortzeko, badia inguruan bizi diren pertsonen “elkarlana” beharrezkoa baita.
