"Garaia da hitzetatik ekintzetara pasatzeko"

Oiartzungo Feministen Asanbladak Yolanda Jaen Gomezen hilketa matxista salatu du; autodefentsa feministarako deia luzatu dute

Erik Gartzia

Oiartzun

2018/10/26

Yolanda Jaen Gomez gogorarazi zuten atzo.

Atzo arratsean, Oiartzungo Feministen Asanbladak deituta, hamarnaka oiartzuarrek Yolanda Jaen Gomezen hilketa matxista gaitzetsi zuten. Pasa den asteartean eman zuten haren heriotzaren berri, aurreko astean, Iruñean, bere bikotekideak etxeari su emanda. Beste lau lagun ere zauritu zituen. Hogei minutuko elkarretaratzea egin ondoren, ohar bat irakurri zuten. Bertan, gogorarazi zuten gizonak aurrekariak zituela genero indarkeriagatik, baita Jaen Gomezekiko urruntze agindu bat ere. “Honek, beste behin ere, indarkeriaren aurkako neurrien hutsuneak azaleratzen ditu”, kritikatu zuten. Aldarrikatu zuten mugimendu feministak lan izugarria egin duela indarkeria matxistari hitzak jartzeko eta jendea sentsibilizatzeko. “Emakumeen kontrako indarkeriak ez du mugarik, bizi sistema kapitalista patriarkalaren funtzionamenduaren ezinbesteko tresna delako; eredu honek sortzen dituen pertsonen arteko botere harremanak betikotzen ditu”, esan zuten. Indarkeria matxistak beste biolentzia mota batzuekin —arrazista edo klasista— ardatza partekatzen duela nabarmendu zuten. Autodefentsarako deia Indarkeria matxista kasuak isolatuak ez direla gogorarazi zuten, sistemaren muinean ematen direla: “Kultura aparatuan, komunikabideetan, estatuan, lan merkatuan, familian edota hezkuntza sisteman…. Horren aurrean, agente sozial, politiko eta instituzional guztien ardura pertsonal eta kolektiboa ezinbestekoa da. Apustu ausartak eta neurri sakonak beharrezkoak dira”. Horregatik, hitzetatik praktikara pasatzeko garaia dela aldarrikatu zuten. Iruñeko hilketa salatzeaz gain, autodefentsarako deia egin zuten. “Gure bizitzak dira jokoan daudenak. Feministok erantzuteko prest gaude! Martxanjarraituko dugu, elkarrekin, borrokan denak aske izan arte”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.