Oarsoaldeko eskola publikoko komunitateen lehen topaketaren balorazio positiboa egin dute

Urriaren 21ean festa ospatu zuten Elizalde Herri Eskolan eta plazan, giro ederrean; 2019ko ekaineko festa handiaren lehen 'aperitiboa' izan da

Erik Gartzia Egaña

Oiartzun

2018/10/31

Ederki pasatu zuten eskola publikoaren festaren ‘aperitiboan’.

2019ko ekainaren 2an Euskal Eskola Publikoaren festa handia ospatuko dute Errenteria-Oreretan. Bitarte horretan, Oarsoaldeko ikastetxe publikoetako hezkuntza komunitateek beraien arteko sarea josten ari dira, festa eskualde osokoa izan dadin. Horretarako, ekitaldiak antolatuko dituzte ikasturte honetan zehar. Lehenengoa urriaren 21ean ospatu zuten, Oiartzungo Elizalde Herri Eskolan. Egunaren balorazio oso positiboa egin zuten antolatzaileek. Errenteria-Oreretatik eta Lezotik Oiartzunera hurbildu zirenak 09:30ean geratu ziren Gamon Zumardian, eta bizikletaz abiatu ziren Elizalde aldera. Oiartzuarrek harrera polita egin zieten, hamaiketakoa eskaini baitzieten. Indarrak hartuta, kalejira egin zuten plazaraino, jende mordoa elkartuta. Elizalde Dantza Taldeko dantzariek agurra dantzatu zieten, eta txalapartaren ttakuna entzuteko aukera ere izan zuten. Bazkari jendetsua Datorren urteko festa handiari buruzko azalpenak eman zituzten, logo eta leloaren berri emanez, eta bertso batekin bukatu zuten ekitaldia. Ikastetxera bueltatu ziren, eta txikienek eskolako paretetako hormetan muralak margotu zituzten. Goizeko jarduerak bukatzeko, hainbat gurasok oihal baten atzean zegoen Makina bat taupada leloa azalerazi zuten. Ondoren, bazkariaren txanda iritsi zen, eta 300 bat lagun elkartu ziren mahaien bueltan. Etxetik eramandako janaria bazkaldu, eta eguna bukatutzat eman zuten. “Oiartzunen egindako topaketan aparteko giroa sortu zen familien artean, eta egun bikaina igaro genuen guztiok, haur zein gurasook”, esan dute antolatzaileek.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.