Memoria ariketa kolektiboa egingo dute, eta orduko testigantzak entzuteko aukeraz gain, dakitena kontatzeko aukera ere egongo da
![1936ko gerra oiartzun](http://oarsoaldea.hitza.eus/site/files/2018/11/Captura-de-pantalla-2018-11-12-a-las-13.40.07.png)
1936ko Gerrari buruz bizitakoak edo entzundakoak partekatzea da hitzaldiaren helburua.
Kattin Txikik eta Torri Gukin taldeek memoria ariketa kolektiboa egiteko saioa antolatu du datorren ostegunerako (hilak 15). Udaletxeko pleno aretoan elkartuko dira, solasaldi formatuan.
Helburua da 1936ko altxamendu faxistak Oiartzunen zein ondorio utzi zituen azaltzea. Lehendabizi, hitzaldi bat emango dute Kattin Txikiko kideek, eta ondoren, hurbiltzen direnek, nahi izanez gero, dakitena partekatzeko eta kontatzeko aukera izango dute.
Guda, guda ondorengoa, herriko pasarteak, Iragorriko hobia, herriko fusilatuak, herriko desagertuak eta abarren testigantzak jaso nahi dituzte. Deialdi berezia egin diete herriko aiton-amonei, hurbil daitezen, batez ere euren iloba edo bilobekin.
Solasaldia 17:00etan hasiko da.