'Oiartzuarrak.org' blogak agur esango dio bere ibilbideari
Lau urteko jardunaren ondoren, datorren astelehenetik aurrera bere edukia ez du berrituko
Lau urteko ibilbidearen ondoren, oiartzuarrak.org blogak agur esango dio bere ibilbideari. Honakoa izan da horren berri eman duen oharra:
Oiartzuarrak.org proiektua 2014 urtean sortu genuen Udalak eta herriko zenbait eragilek elkarlanean, herriko elkarteei euren ekintzen berri emateko gune bateratu bat emateko asmoz. Asmoa eragile bakoitzak autonomoki funtzionatzea zen, blogera albisteak eta agendako deialdiak igota sare sozialetan ere zabalduz. Hasierako helburu batzuk bete diren arren, funtzionamendu autonomoa ez du lortu blogak. Aurtengo urte hasieran, Oiartzuarrak.org proiektuaren inguruko balorazioa egin genuen. Horretarako, bloga zuten (edo noizbait izan zuten) eragileen iritziak bildu genituen. Guztiek oiartzuarrak.org-en baliagarritasuna aitortu arren, eragile gehienek konpromisoak hartzeko prestutasunik ez zutela adierazi ziguten. Hori dela eta, oiartzuarrak.org proiektua bukaerara heldu dela jakinarazi behar dizuegu. Datorren astelehenetik (azaroak 19) aurrera, webgune honek publiko izateari utziko dio. Eskerrik asko urte hauetan ekarpenak egin dituzuenei eta proiektuaren jarraitzaile izan zareten oiartzuar guztiei.
