Umorez azalduko dute Euskaraldia zer den
Bea Egizabal klownak 'Ttak' bakarrizketa taularatuko du datorren ostegunean; Euskaraldirako propio sortutako bakarrizketa izango da
Gaur zortzi hasiko da Euskaraldia, eta 11 egunez iraungo du. Bertan nola jokatu eta figura bakoitzaren esanahia oraindik ulertu ez duenak, aukera dauka bihar 10:00etan, edo astelehen eta asteazkenean 18:00etan Elorsoro kiroldegiko bilera gelatik pasatzeko. Bestela ere, hilaren 22rako —osteguna— saio bat antolatu dute udaletxeko pleno aretoan.
Kasu horretan, umorea izango da saioaren ardatza. Beatriz Egizabal klownak Ttak bakarrizketa eskainiko du, Euskaraldirako propio sortu duena. Euskaraldia zer den ezagutzera emango du, hizkuntza ohiturei buruz hausnarketa egingo du, eta Euskaraldirako jokabide egokienak zeintzuk diren azalduko ditu. Hori guztia, umorez. Hilaren 23an hasiko den ariketa kolektiboan nola jokatu dakitenak ere joan daitezke. 19:00etan hasiko da bakarrizketa.
