Migratzaile eta errefuxiatuei erantzun bat eman eta eraginkorragoak izatekoa eskatu diete erakundeei.
Migratzaileen problematikan fokua jarri nahian kale ekintza ikusgarria egin dute gaur
Herrien Astearen barruan hainbat kolektibok. Oiartzun ibaiaz baliatu dira ekintzarako: txalupak eta itotako pertsonak irudikatzen zituzten panpinak uretaratu dituzte; txalupak hutsik eta zerraldoak flotatzen, itsasoan egunero-egunero bizia galtzen duten pertsonak gogoan.
Ongi etorri errefuxiatuak! Nora begira zaudete instituzioak? horixe ekintzaren goiburua, eta erakundeei, berriz, galdera zehatz bat: “Nola begira zaudete?”
Administrazioak migratzaileak behar bezala artatzeko nahikoa ahalegin ez duela egiten uste dute antolatzaileek, eta erakunde arduradunen hutsuneak estaltzeko Harrera Sareak ezinbestekoak direla ohartarazi dute.
Muga zeharkatu nahian gurera gero eta migratzaile gehiago iristen direla ohartarazita, erakundeei arretatsuagoak eta eraginkorragoak izateko eskatu diete.
GOT Grupo Oarso Taldeak antolatu du ekintza, eta SOS Arrazakeria, Harrerako Sare Herritarra Donostia-Irun, Ongi Etorri Errefuxiatuak, Zaporeak, Oreretako Mugimendu Feminista, Amnistia Internacional, Intermon Oxfam, Salvamento Marítimo Humanitario eta Banco Obrero Donostiak bat egin dute deialdiarekin.