[Bideoa] Indarkeria matxistaren harresia eraitsi dute

Emakumeen Aurkako Indarkeriaren Kontrako Egunean aldarrikapena izan da nagusi; bihar dokumental emanaldia egingo dute

2018/11/26

Kontzeptu matxistekin bete zuten harresia, ondoren eraisteko.

Emakumeen Aurkako Indarkeriaren Kontrako Eguna izan zen atzokoa. Oiartzungo Feministen Asanbladak deituta, askaria egin zuten arratsaldean, herriko feministak saretzeko asmoz. Aldarriaren txanda ondoren etorri zen. Kontzeptu matxistak biltzen zituen harresia bota zuten, indarkeria matxista suntsitzera doazela adierazteko. Izan ere, indarkeria matxistarengatik inor ez da salbu. Oiartzungo Udalak herriko datuak eman ditu: udal zerbitzuek azken bi urteetan hamazazpi laguntza eskaera jaso dituzte, eta horietatik bederatzi bukatu ez den urte honetan identifikatu dira. Gaur egun, udal zerbitzuek bederatzi kasu artatzen dituzte. Genero indarkeria pairatzen duten emakume askok seme-alabak dituzte: bederatzi haur oiartzuar daude egoera horretan. Udala, bere aldetik, Gizarte-Ongizate Zerbitzuko langileak eta udaltzainak formatzen ari da. Ekitaldi gehiago Azaroaren 25aren bueltako ekitaldia ez dira bukatu. Bihar arratsaldean, 19:00etan, Mujeres decididas dokumentala eskainiko dute pleno aretoan. Mundubat Gobernuz Kanpoko Erakundeak ekoitzi du. Itxaso Diazek eta Higinia Garayk zuzendutako dokumental hori abortatzeko eskubidearen aldeko dokumentala da, El Salvador eta Hondurasko emakumeen errealitate gogorra hizpide hartuta. Emanaldiaren ondoren, bi zuzendariekin solasaldia izango da. Ostegunean, hilak 29, toki eta ordu berean, hitzaldia egingo dute. Alcasserretik La Manadara, indarkeria matxista eta makinaria mediatikoa mahai-ingurua izango da, June Fernandez eta Nerea Barjolarekin.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.