2210 pasaitarrek eman dute izena Euskaraldian
1427 ahobizi eta 783 belarriprest ari dira ariketan parte hartzen
Astelehenean bukatuko da Euskaraldia, Euskararen Nazioarteko Egunarekin bat eginez, eta ariketa bukatzear dela Pasaiako datuak jakinarazi ditu udalak. Pasaian, guztira, 2210 lagunek eman dute izena Euskaraldian, 1427 ahobizi eta 783 belarriprest, Pasaian parte hartu zezaketen guztietatik ia %25.
Ariketa, baina, oraindik ez da guztiz bukatu. Antxoko Euskaraldiaren talde eragileak “fotokaldia” antolatu du iganderako (hilak 2). Euskaraldian parte hartzen ari diren antxotar guztiei luzatu diete gonbidapena, lagunekin, familiarekin, … nahieran Gure Zumardira hurbiltzeko, 12:30ean, eta txapak soinean argazkiak egin eta mokadutxoa egiteko.
Horrez gain, bihar (hilak 1), Donibanen eta Trintxerpen, Euskararen Eguna ospatzeko ekitaldiak antolatu dituzte.
Pasaiako Udalak, azkenik, adierazpena onartu du Euskararen Nazioarteko Eguna dela-eta.
