Euskaraldiaren balorazioa egiteko saioak antolatu dituzte
Barruti guztietan jasoko dira iritziak, datorren astean
Pasaiako Euskaraldiak balorazioa egin nahi du eta horretarako lau saio antolatu ditu, bana barruti bakoitzeko. Helburua, pasaitarrek egitasmoaren gainean duten iritzia jaso, ekarpenak bildu eta aztertzea, etorkizunean aintzat hartzeko. Bizipenak elkarbanatzea da asmoa, hausnarketa pertsonalak eta kolektiboak bultzatzeko.
Parte hartzera deitu dute antolatzaileek, “11 egunetan zehar bizitako esperientziak partekatzea Euskaraldiari itxiera emateko eta datozen 365 egunetan ere ahobizi eta belarriprest izatera animatzeko aukera ona” dela baietsita.
Edonola ere, balorazio saioetara ezin joatekotan, Internetez balorazio inkesta egiteko eskatu dute.
Euskaraldiak Pasaian oso harrera ona izan duela nabarmendu dute iniziatibaren bultzatzaileek, eta parte-hartze datuak gogorarazi dituzte. Denera, 2.210 lagunek eman dute izena, 1427 ahobizi eta 783 belarriprest. Guztiak zoriondu dituzte.
Saioak:
- Trintxerpe: hilaren 17an, 19:00etan, alkateordetzan.
- Antxo: hilaren 18an, 18:00etan, kultur etxean.
- San Pedro: hilaren 19an, 18:00etan, udal aretoan.
- Donibane: hilaren20an, 18:30ean, Donibaneko kultur aretoan.
