Munttarpek eta udalak elkarlanean antolatu duten egunaren helburua da Lezoko emakume kirolariei aitortza egitea, aurrera begira indarra emateko.
Munttarperen taldea omenduko dute, beste askoren artean, larunbatean.
Munttarpe Eskubaloi Klubak, Lezoko Udalaren laguntzarekin, Neska Kirolarien Eguna antolatu du larunbaterako.
Egitarau oparoa antolatu dute, hainbat osagairekin. Egunaren helburua da Lezon kirolean, taldeka edo bakarka, dauden emakumeei aitortza egitea aurrera jarrai dezaten indarra emateko, eta aldi berean belaunaldi gazteei jakinaraztea, neskei batez ere, herrian badirela kirola oso maila altuan egiten duten emakumeak.
Hasteko, lagun arteko eskubaloi partida jokatuko dute Super Amara Bera Bera eta Liberbank Gijon taldeek. 16:30ean da, Bekoerrota kiroldegian. Horren ondoren, Matraka elektrotxarangaren laguntzarekin, Goiko Plazako probalekura joango dira bertan lezoar gazte talde batek eta Oñatiko Aloña Mendikoek giza proba desafioa egingo dutelako (18:30ean).
Horren ondoren, 20:30ean, Lezo Herri Eskolako patioan Lezoko emakume kirolariei aitortza ekitaldia egingo zaie: Allerruko (futbola), Munttarpeko (eskubaloia), Kurkubiko (saskibaloia) taldeetako kideei, nahiz Lierni Lekuona txirrindulariari eta Maddi Fernandez bodyboard kirolariari oroigarriak emango dizkiete. Murixka Dantza Taldeari ere aipamen berezia egingo diote.
Oroigarriak emanda, afaltzea, Herri Eskolako patioan bertan: sarrerakoak, piper beteak, onddo risotoa, oilaskoa saltsan eta limoi sorbetearekin aseko dute gosea bertaratzen direnek. Kafea menuaren barruan dago. Eta gauerdian, DJ Polasek girotuko du afalostea.
Sarrerak eta txartelak
Bera Beraren eta Gijonen arteko partida ikusteko sarreren zerrenda honakoa da:
- Helduak (18 urtetik gorakoak), 6 euro.
- Munttarpeko bazkideentzat sarrera, 4 euro.
- Gazteak (12-18 adin tartekoak), 4 euro.
- 12 urtetik beherakoak doan sar daitezke partidara.
Bestalde, herri afarirako tiketen prezioak honakoak dira:
- Helduen tiketak, 18 euro.
- Munttarpeko bazkideen prezioa, 15 euro.
- Gazteen tiketen prezioa (14 urtetik beherakoak), 12 euro.
Bai partidarako sarrerak, zein afarirako txartelak Bekoerrota kiroldegian, Tiñelu elkartean, Sotxo tabernan, Sotxo tabernan eta Xera gastrotekan (Errenteria-Oreretan) eros daitezke.
