[Galeria] Txerria eta giro ona borrokan aritu dira, protagonismoa nork lortuko
Txeri Eguna ospatu dute gaur Oiartzunen; ehunka lagun hurbildu dira Madalensoro ingurura, hango giroaren parte izatera eta gozatzera
Urteroko talo postuak (eta dagokion ilarak) ez dute hutsik egin. 
Urteroko talo postuak (eta dagokion ilarak) ez dute hutsik egin.
Ttur-tturrek antolatuta, Txerri Eguna ospatu dute gaur goizean Oiartzunen. Madalensoro ingurua bihurtu da festaren epizentroa. Barruan, artisauak —eta herriko hainbat eragile— beren produktuak saltzen aritu dira, 10:00etatik 14:00etara bitartean.
Artisauek egindakoak ez dira bisitarien agerian egon diren bakarrak. Pilotalekuaren kanpoaldean ganadu feria egin dute, eta horien errege izan da txerria, Karrikatik ekarritakoa (datorren urtean bidegorritik etorriko da). Aterpean zegoen animalia bakarra zen.
Txerriak emandako fruituak saltzen aritu dira Elizalde Institutuko eta Haurtzaro Ikastolako ikasleak, crowfunding-ak ahaztu eta izerdi pixka bat botatzen, kalean jarri dituzten txosnetan. Ikastetxe horietatik sortutako dantza taldeek protagonismo puntu bat ere izan dute, dantzak eskaini baitizkiete oiartzuarrei.
Txerri Eguneko beste klasiko bat dira zozketak. Haurtzarok, Errigorak eta Ttur-tturrek beren produktuak zozkatu dituzte (irabazleei telefonoz deituko diete). Itturri merkataritza elkarteak bere kanpaina bukatu du gaur; Nahia Mazizior izan da irabazlea. Ehun euroko bonua jasoko du, eta ziur Gabonetarako oparietan xahutzerakoan eskertuko duela.
Azoka(k) bukatuta, egitarau ofizialean ez da ekitaldi gehiago izan, baina horrek ez du esan nahi goizean nagusi izan den giro ona bukatu denik. Jarrai beza festak.
