Lekuonako areto bati Txillardegiren izena jartzeko eskatu dute
Jose Luis Alvarez Enparantzaren izena eta jarduna aldarrikatzeko daudela oraindik esan du Lau Haizetara euskaltzaleon topaguneak.
Txillardegiren omenezko plaka bat Arantzazun. Etorkizuneko Lekuona Kulturguneko eraikinean leku esanguratsu bati Txillardegiren izena emateko eskatu du Lau Haizetara Euskaltzaleon Topaguneak. Atzo bete ziren zazpi urte Jose Luis Alvarez Enparantza hil zela, eta Errenteriako Udalari luzatu dio eskaera hori euskara elkarteak, Euskara Batuaren sorreraren 50. urteurrena bete denean.
Txillardegiren izena Errenteria-Oreretako paisaia linguistikoan agertzea nahi du euskara elkarteak, uste duelako, haren izena eta jarduna aldarrikatzeko daudela oraindik: “Mitxelena-Txillardegi bikotea zela eta gaur egun euskara batua badugu, eta biak haren sorreran batera aritu arren, bien gizarte errekonozimendua zeharo asimetrikoa da gaur egun. Horrela, Koldo Mitxelena onartua bezain aitortua da gure herrian adibidez, baina uste dugu Txillardegiren izena eta jarduna aldarrikatzeko daudela oraindik. Horregatik, agerian jarri nahiko genuke haren ondare materiala (liburuak, ikerketak eta abar) eta ez materiala (haren presentzia gure herrian)”.
Lau Haizetara Euskaltzaleon Topaguneak 1992an sortu zenetik eginkizunetako bat euskal hiztunei eta euskal kulturari ikusgarritasun soziala ematea izan duela eginkizunetako bat esan du.
1957an Txillardegi euskaltzain urgazle izendatu zuela Euskaltzaindiak ekarri du gogora Lau Haizetarak, “baina ez zuen inoiz euskaltzain oso egin, eta Euskal Herriko Unibertsitateak ere ez zuen inoiz katedratiko izendatu”. Halere, ezin dela ulertu euskara bataren historia hura gabe nabarmendu du, bere bizitza osoa hizkuntzari eskaini ziolako. Txillardegiren figura balioan jartzera deitu du, eta euskal kultura harekin “zorretan” dagoela erantsi du: “Asko zor dio, eta zor hori kitatu beharra dago. Txillardegi izan da Europako kulturaren berri euskal literaturan estreinakoz eman duena, literatura berria euskaraz eman zigun idazle urbanoa, eta tokiko historia gure hizkuntzan landu duena baita Euskal herri zaharrera Europa berriko ekarpen intelektualak ekarri zituen idazlea ere”.
Ekarpen handiak egin zituen Txillardegik literaturan zein saiakeran, gogamen filosofiko edota politikoan, eta zehazkiago, glotopolitikan, dialektologian, fonetikan, nahiz euskal azentuan, besteak beste.
