Etorri berrientzako AISA euskara eskolak emango dituzte
Otsailaren 25ean hasi eta ekainaren 21ean bukatuko da, eta asteko lau orduko erritmoan ariko dira. Otsailaren 15era arte eman daiteke izena.
Intxixu-AEKn emango dituzte eskolak. Oarsoaldeko Euskara Batzordeak herritar etorri berrientzako hastapeneko AISA euskara eskolak antolatu ditu eskualdeko lau herrietan. Oiartzunen ere, Euskal Herritik kanpo etorri eta herrian erroldatuta dauden 16 urtetik gorako herritarrei zuzenduta dago ikastaroa.
Euskarazko lehen hurbilpena eskaini nahi dute eta modu honetan euskaltegietako hurrengo urratsak emateko bultzada erraztu. Ikastaroak 60 ordu izango ditu. Otsailaren 25ean hasi eta ekainaren 21ean bukatuko da, asteko lau orduko erritmoan. Astean bi orduko bi saio jasotzeko aukera egongo da, edota larunbat goizetan lau orduko saioa egitekoa. Eskolak Intxixu AEK-n emango dira, baina lekua aldatzeko aukera ere egongo da, hala nahi bada.
Izen emateko epea
Otsailaren 15era arte egongo da izena emateko aukera. Horretarako Udalaren euskara zerbitzura jo beharko da: Oiartzungo Euskara Zerbitzua (Fermiñene etxean dago). Telefono zenbakia honakoa da: 943 493 842.
