Informazioa bai, baina zalantzak ere bai
Goxatu Egutegia banatzen ari dira Pasaian nerabe eta gazteen artean, behar izanez gero, sexualitate eta genero informazio eta aholkularitza zerbitzura noiz eta non jo dezaketen jakin dezaten; 2016tik dago martxan zerbitzua
Pasaian 2016. urteaz geroztik dago martxan Goxatu, sexualitate eta genero informazio eta aholkularitza zerbitzua. Pasaiako Udalaren Gazteria Sailak eta Berdintasun Arloak elkarlanean antolatutako zerbitzua da, nerabe eta gazteek sexu arloan duten informazioa hobetzea helburu duena, eta era berean, prebentzioa landu eta indarkeria matxistari aurre egin nahi diona.
Egunotan Goxatu Egutegia banatzen ari dira Lehen Hezkuntzako seigarren mailatik gorako ikasleei, nahiz DBHko eta Batxilergoko ikasleei. Baita Pasaiako Lanbide Heziketako Zentroko ikasle eta Udal Gaztelekuetako gazteei ere. Horrez gain, datozen egunetan adin bertsukoen udal zerbitzu guztietan banatuko dute: kale-heziketaren programan eta liburutegietan, besteak beste.
Halaber, interesa agertzen duten elkarteetan, eta nerabe eta gazteekin diharduten kolektiboetan ere banatuko dute egutegia.
Udalak jakinarazi dutenez, «egutegia oso harrera ona» izaten ari da. Egutegiaren zergatiaz, berriz, Itsaso Cañadak hitz egin du. Lahia 3.0ko elkarteko kide da Cañada, Pasaian zerbitzua kudeatzen duen elkarteko kidea: «Gu asteazkenero gaude Pasaian, baina txandaka Antxon eta Trintxerpen, eta Donibanen asteartetan hamabostean behin. Iruditzen zitzaigun gazteentzat nahiko nahasgarria izan daitekeela, eta horregatik erabaki genuen egutegia inprimatu eta banatzea» (ikus egutegia pasaia@hitza.eus-en).
Zerbitzuak Pasaian orain arte izan duen harreraz galdetuta Cañada baikor mintzo da: «Nik esango nuke nahiko harrera ona izan dugula herrian. Gainera, zerbitzua zabaltzen joan da. Hasiera batean Antxon eta Trintxerpen bakarrik ginen, gero Donibanera ere pasatu ginen eta aurtengo berritasun nagusia da Antxoko gazteleku berrian gaudela». Orain arte, Antxon, gizarte zerbitzuen bulegoan eskaini dute zerbitzua, baina «Gaztelekua askoz ere leku egokiagoa dela» dio, konbentzimendu osoz, Cañadak. Trintxerpe-San Pedron eta Donibanen, Gaztelekuetan eskaintzen dute zerbitzua baita ere, 17:30etik 19:30era hiru kasuetan.
Informazio eta aholkularitza eskatzeko, edonola ere, ez da ezinbestekoa Gaztelekura jotzea. Cañadak ohartarazi duenez, «zerbitzuan gauza intimoak hitz egin nahi izaten dira, eta jendeari hasieran kosta egiten zaio gerturatzea». Horregatik, Cañadak ustez zerbitzua denboran mantentzea garrantzitsua da, gazteek jakin dezaten behar izatekotan eskura dutela.
«Aukera bat da zerbitzura etortzea zuzenean. Hau irekia da, ez dago zita eskatzeko beharrik, nahi duena etor daiteke nahi duen momentuan, banaka, lagun batekin, bikotearekin, amarekin edo kuadrillan», azaldu du Lahia 3.0ko kideak, eta jarraitu du: «Beste aukera bat litzateke sare sozialen bitartez gurekin harremanetan jartzea. Instagrameko kontu bat dugu, eta gazteek erabili dezakete galdera bat egiteko, edo etorri nahi dutela eta gai bat landu nahi dutela esateko. Horrela guk aurrez egokitu dezakegu saioa beraientzako ere».
Posta elektronikoz ere bidera daitezke kontsultak, sexuaholkularitza@pasaia.net helbidearen bitartez.
Informazio gaindosia
Egungo gazteek informazio asko dutela uste du Cañadak, baina aholkularitza behar izaten dutela dio, zailtasunak dituztelako informazio fidagarria topatzeko: «Hainbeste informazioa dago, oso zaila dela jakiten zer informazio den egia, zeintzuk diren mitoak… Askotan guregana etortzen direnean informazio piloa dute, baina hori ikusi behar izaten da».
Horrez gain, «bizipen pertsonalak komentatu eta argitzeko ere» jotzen dute zerbitzura, «hortik sortzen zaizkien zalantzak edo arazoak argitzera».