Kirol Sarirako proposamena egiteko epea zabalduko dute
Oiartzuarrek hilaren 21etik otsailaren 3ra bitartean egin dezakete proposamena. Girizia elkarteko kirol sailak, Periko Sanromak eta Artasok jaso dute orain arte.
Iazko Kirol Sariaren mahai ingurua. Kirol Sarirako proposamena egiteko epea zabalduko dute datorren astelehenean, hilak 21. Oiartzuarrek otsailaren 3ra arte izango dute bere proposamena egiteko aukera.
Oiartzungo IV. Kirol Saria kirolaren alde egindako lanarengatik, ibilbidearengatik edo lortutako emaitzengatik nabarmendu diren oiartzuarrei aitorpena egiteko saria da. Horretarako, udalak, herritarren proposamenak jaso nahi ditu.
Proposamenak Elorsoro kiroldegiko sarreran jarriko den kutxan edo udalaren webgunean egin ahal izango dira. Saritua nor izango erabakitzeko ardura Oiartzungo Kirol Aholku Kontseiluak izango du.
Sarituak
Aurreko hiru urteetan Girizia Elkarteko kirol sailek, Haurtzaro Atletismo Taldeko sortzaile Periko Sanromak eta xanistebanetan auzo arteko sokatira txapelketa antolatzen duen Artaso Elkarteak jaso dituzte Kirol Sariak.
Kirol Saria, ohi bezala, Kirol Astean banatuko dute. Martxo hasieran izango da hori.
