'Hazia heziz, loratu' matrikula kanpaina abiatuko du Haurtzarok
Hilaren 28an irekiko dute matrikulazio epea. Bihar Haur Hezkuntza proiektua aurkezteko bilera egingo dute Urmendin. Ate irekien jardunaldiak ere egingo dituzte.
Otegi, Gonzalez, Etxebeste eta Iragorri. Haurtzaro Ikastolak ‘Hazia heziz, loratu‘ leloa hautatu du 2019-2020 ikasturteko matrikulazio kanpainarako. Hilaren 28an hasiko da eta otsailaren 8an bukatuko da. Bulego ordutegian egin beharko da matrikulazioa: goizez, 08:30etik 13:15era, eta arratsaldez, 14:30etik 17:30era. Familia-liburua eta nortasun-agiriaren kopia aurkeztea beharrezkoa izango da
Matrikulazio-epea zabaldu aurretik, guraso bilera eta ate irekien jardunaldia antolatu ditu ikastolak. Informazio bilera bihar izango da, Urmendin. Bilera euskaraz egingo dute, eta aldi bereko itzulpena egongo da.
Saioan hizlariak hauexek izango dira: Ibintza Iragorri, Urmendi haur eskolako zuzendaria; Iraia Etxebeste, Urmendi haur eskolako koordinatzailea; Aritz Gonzalez, Haurtzaro Ikastolako zuzendaria; Roxali Otegi, Haurtzaro Ikastolako HH-ko ikasketaburua eta Izaskun Sistiaga, Haurtzaro Ikastolako HH-ko koordinatzailea
Ate Irekien Jardunaldia
Biharko bileraz gain, ikastola gertutik ezagutu nahi duen ororentzat, Haurtzaro Ikastolak ateak zabalduko ditu hilaren 24an eta 25ean. Goizez eta arratsal 10:00etan eta arratsaldeko 15:00etan eta 17:00etan. Ate irekietara joateko asmoa duenak aldez aurretik jakinarazi behar du, 943 49 16 59 telefono zenbakira deituz edota e-posta bidez.
Haur Hezkuntzako espazio berritua
Haurtzaro Ikastolak berrikuntza nabarmenak eginak ditu Haur Hezkuntzan. “Marko pedagogiko berria eta eraikuntza berria estreinatu genituen iaz”, azaldu du Aritz Gonzalez zuzendariak. Ikaslea dela erdigunean dagoena gaineratu zuen: “Ikasleak ongi sentitzea eta ikasteko motibatzea da gure lehentasuna. Horretarako, Haur Hezkuntzan, ikasle bakoitzaren erritmoak eta gogoak errespetatuko dituen marko pedagogiko berria jarria dugu martxan. Eraikina ere berritu egin genuen eta eguneroko jarduna haurraren garapenerako lagungarriak diren espazioetan antolatu genituen”.
Lehen Hezkuntzako ikasleek EKI-LH eta KiVa programan parte hartzen dute. Bestetik, ingelesean murgiltzeko FIE programa ere jorratzen dute. “Aurten ere, esate baterako, bi asteko murgiltzea egin dute ama hizkuntza ingelesa duten irakasleekin”, nabarmendu du Gonzalezek.
Derrigorrezko Bigarren Hezkuntzarako EKI proiektua lehenetsi dute. “Konpetentzietan oinarritzen dugu; ikasleak konpetentziak bereganatzen ditu, eta horiei esker, bizitzako egoera errealei aurre egiteko zailtzen dira. Konpetentziak eta digitalizazioa dira oinarri nagusiak, paperezko libururik apenas erabiltzen baita”, azaldu du ikastolako zuzendariak.
Aritz Gonzalezek gogoratu du: “Ikastolan jasotakoa emaitza akademikoetatik askoz harago doa: lagunak, bizipenak, euskara, aurkikuntzak, jolasak, ospakizunak, emozioak… horiek guztiak dira Ikastolako haurren oroitzapenen kutxak betetzen dituztenak eta ikastolako eskaintza berezi egiten dutenak. Horregatik ‘Hazia heziz, loratu‘ egiten da”.
