581 euro Mindararen lana babesteko
Abenduan egin zen maratoi solidarioan bildutako dirua Mindara elkarteari eman diote gaur antolatzaileek.
Zumba maratoi solidarioa antolatu zuten Kiroletako azpisailak eta Be-One, Galtzaraborda eta Fanderiako kiroldegiak kudeatzen dituen enpresak pasa den abenduaren 22an. Laugarrenez egin zuten elkartasuna helburu duen iniziatiba, eta gaur, maratoi horretan jasotako diru guztia, Mindara elkarteari eman diote.
Gorka Bengoetxea Be-One enpresako zuzendariak, Jon Txasko Kirol zinegotziak, eta Mikel Izagirre eta Erika Martinez Mindara elkarteko ordezkariek hartu dute parte gaurko agerraldian. Bengoetxeak eskerrak eman dizkio udalari maratoia egiteko baliabideak eskura jartzeagatik, baita Mindarari dibertsitate funtzionala duten pertsonen alde egiten duten lanagatik. 90 lagunek hartu zutela parte elkartasun maratoian zehaztu du Bengoetxeak, “15 haurrak izan ziren, eta gainontzekoak helduak. Guztira 581 euro lortu ditugu sarrera eta 0 ilararen bidez. Espero dugu diru hori lanean jarraitzeko lagungarri izango duela Mindarak”.
Martinezek hartu du hitza Mindararen izenean, eta eskerrak eman dizkio udalari eta Be-One enpresari. Dirua oso ongi etorriko zaiola elkarteari esan du, “halako ekarpenak ditugun proiektu ezberdinetara bideratzen ditugu. Laguntza handia dira”. Eskerrak eman dizkie Martinezek maratoian parte hartu zutenei ere bai, “beren ekarpenarengatik”. Parte hartzaileei eskerrak eman dizkie, halaber, Txaskok, “maratoian parte hartuta ekarpena egiten dutelako Mindara bezalako elkarteek lanean jarrai dezaten. Balio dezala diru honek proiektu gehiago bultzatzeko”.