Gaztetxoen teknologia digitalen erabilera aztertuko dute
Galdetegi bat banatuko dute herriko hiru ikastetxeetako hainbat gurasoren artean, prebentzioan balizko erabakiak hartzeko. Konfidentzialtasuna gordeko da.
Gaztetxoen erabilera ohiturak jakin nahi dituzte, ekintzak diseinatzeko. Oiartzungo gaztetxoek teknologia digitalen inguruan dituzten ohiturak eta erabilerak ezagutzeko inkesta egingo dutela iragarri dute. Hilaren 28tik otsailaren 15a bitartean egingo dute galdeketa, eta honakoak izango izango dira parte hartzaileak, jakinarazi dutenez: Elizalde Herri Eskolako, Elizalde Institutuko eta Haurtzaro Ikastolako LH 5. Eta DBH 4. mailetako ikasle eta gurasoak.
Ikastetxeek banatuko dituzte galdetegiak eta erabat anonimoak izango direla ziurtatu dute. Egoera erreala ezagutzea izango da helburua, eta horren arabera, prebentzio eta formakuntza ekintzak beharretara egokitzea.
Gizarte-Ongizate saileko Adin Txikiko Mahaiak 2015ean eta 2017an ere egin zituen ikerketak. Horietatik abiatuta, ikasleentzako formakuntza saioak eta gurasoentzako hitzaldiak antolatu izan dituzte, beste hainbat ekitaldiren artean.
Udaleko Adin Txikiko Mahaiak EHUko ikerlariekin elkarlanean aritu dira. Honako eragileek osatzen dute Oiartzungo Adin Txikiko Mahaia: Gizarte-Ongizate zinegotzia, udaleko Gizarte-Ongizate, Feminismo eta Gazteria teknikariak; Agintzari; AGIPAD; Elizalde Herri Eskola; Elizalde Institutua; Haurtzaro Ikastola eta Ttak-ek.
