Junkal Mintegiak EH Bilduren Pasaiako alkategai izateko hautagaitza aurkeztu du
Igandera bitartean hautagaitzak aurkezteko epea zabalik dela iragarri du koalizio abertzaleak; otsailaren 2an hautagaiak aurkezteko ekitaldia egingo dute.
Junkal Mintegia lehen lerroan, bere hautagaitza babestu duten lagunek inguratuta. Igandera bitartean beste hautagairik aurkezten ez bada Junkal Mintegia antxotarra izango da Pasaiako EH Bilduren alkategaia datozen udal hauteskundeetan. Lau barrutietako 15 bermatzailek babestuta aurkeztu du Mintegiak bere hautagaitza, tartean, Amaia Agirregabiria eta Maider Ziganda alkate ohiak daudela.
EH Bilduk jakinarazi duenez, herri batzarretan jaso dituzten proposamenen artean gehien errepikatu den izena izan da Junkal Mintegiarena, eta antxotarrak erronkari heldu eta hautagaitza aurkeztea erabaki du.
Edonola ere, hautagaitzak aurkezteko epea igandera bitartean (hilak 27) zabalik jarraitzen duela jakinarazi du koalizio abertzaleak, eta “edozein bilkidek bere burua aurkez dezakeela” ohartarazi, beti ere 15 abalez lagunduta. Horretarako webgune bat du martxan EH Bilduk, azaldu dutenez, “Euskal Herri osoko zerrenden aukeraketarako tresna”. Hautagai bat baino gehiago aurkeztuko balitz, haien artean aukeratu beharko lukete EH Bilduko kideek.
Azkenik, otsailaren 2an Antxoko Kultur Etxean ekitaldia egingo dutela aurreratu dute, hautagaitza bakarra izanez gero, alkategaia aurkezteko, eta hautagaitza bat baino gehiago izanez gero, denak aurkeztuko, gerora EH Bilduren oinarriek horien artean hauta dezaten.
Hautagaiaren profila
52 urteko antxotarra da Junkal Mintegia. Pasaia-Lezo Lizeoko lehendakari izandakoa, gaur egun kultura dinamizatzailea da Errenteriako Udalean, eta oso pertsona ezaguna da hainbat herri mugimendutan partaide aktibo izateagatik.
Haren bermatzaileak ondokoak dira: Miguel Mari Torrea, agintaldi honetan Pasaiako Udalean EH Bilduko bozeramailea; Amaia Agirregabiria eta Maider Ziganda alkate ohiak; Aitor Askasibar Ezama, Miren Berasategi Mora, Izaskun Biurrun Ledesma; Ramon Illarregi Elberdin, Amaia Irulegi Eizagirre, Agustin Migeltorena Larraburu, Miren Murua Arrizabalaga, Peio Sanz Garcia, Lurdes Sistiaga Lujanbio; Karmele Sistiaga Toledo, Iker Rodriguez Serantes eta Ane Zubizarreta Gonzalez.
