Kalean jarraituko dute
Eskaera guztiak lortu arte kalera ateratzen eta borrokan jarraitzeko konpromisoa berretsi dute gaur eta hauteskunde urtea izango dela aurtengoa nabarmendu du Duintasunak.
Kalean jarraituko dute. Urrats txiki batzuk aurrera egin badu ere beren borrokak, oraindik orain ez dute lortu beren eskaerak betetzea, eta ez dute, beraz, beste biderik ikusten, kalean, aldarrikapenekin jarraitzea baino. Eskaera zehatzak egin dituzte protestan hasi zirenetik jubilatu eta pentsiodunek: KPIaren araberako pentsioen igoera bermatzea; 1080 euroko gutxieneko pentsioa; iraunkortasun faktorea bertan behera uztea; eta 2011 eta 2013 urtean egin ziren lan eta pentsioen erreformetan onartu zituzten murrizketa guztiak bertan behera uztea. Pentsio sistema publikoa indartzea eta bermatzea eskatzen dute, halaber, eta horien pribatizazioaren kontra daude.
Horiek guztiak lortu arte kalera ateratzen eta borrokan jarraitzeko konpromisoa berretsi dute gaur eta hauteskunde urtea izango dela aurtengoa nabarmendu du Duintasunak: “Kalera ateratzen jarraitu behar dugu; garrantzi bizikoa izango da gure aldarrikapenek kaleak hartzea datozen hilabete hauetan udal hauteskundeak, foru hauteskundeak eta Europakoak izango dira, eta alderdi guztiak saiatuko dira behintzat gure eskaeren kontra ez azaltzen”.
Aipamen berezia egin diote martxoaren 8ari. Egun horren harira mugimendu feministak deitutako mobilizazioak babestu ditu Duintasunak.