Bizkaia plazako altzariak eta argiteria konpon ditzan eskatu dio udalak Portuari
Donibaneko plazaren mantenua Portu Agintaritzari dagokio
Eserlekuak puskatuta eta argiteri eskasa. Donibaneko Bizkaia plazako altzarien egoera kaskarrak herritar askoren kexak eragin ditu, eta horiei erantzunez, gaur, Pasaiako Udalak jakinarazi du Portu Agintaritzari eskatu diola haien konponketa.
Bizkaia plazaren mantenua Portu Agintaritzari dagokio. Izaskun Gomez alkateak prentsa ohar bidez zehaztu duenez, gaur bertan helarazi diote eskaera, idaztiz, eta plazaren egoera erakusten duten argazkiak lagunduta.
Udalak konponketa lanei ahalik eta azkarren ekiteko eskatu dio Portuari, jesarleku ia denak puskatuta daudelako, eta argiztapen eskasak herritarrengan arrisku eta ziurgabetasun sentsazioak eragiten dituelako.