Lezoko PSE-EE: "Herriaren gobernantzaren eta udalaren ekintza lidergoaren giltza izan gara"
Lezoko PSE-EE gustura dago legealdian egindako lanagatik. Gobernu taldeko kide izan da Jose Angel Sanchez zinegotzia. Agintaldiaren balorazioa egin du.
Joxean Sanchez, PSE-EEko Lezoko zinegotzia. Agintaldi honetan Lezoko gobernu taldearen partaide bezala egin dituenen balorazioa egin du herriko PSE-EEk: “Herriaren gobernantzaren eta lidergoaren giltza izan gara”. Ogasun, Ingurumen, Lan eta Garapen Ekonomiko sailetako ardura izan du Jose Angel Sanchez zinegotziak, eta esan duenez, hauteskunde programan idatzitakoen %90 bete du, “programa lezoarren nahi eta beharretarako egokia zela argi geratu da”. Atalez atal egin dute Lezoko sozialistek agintaldiaren balorazioa. “Ezker abertzaleko udal gobernuek eragindako buxadura eta lozorro egoeratik ateratzeko bidean ekarpen handia egin dugu. Geldirik zeuden herritarren eskaerak konpondu ditugu. Gure hauteskunde programa bete dugu. Oraindik badago lana egiteko, ordea, eta sozialistok ez dugu atzera urratsik egingo lortu ditugun gizarte konkisten inguruan”.
Ogasun arloan, aipatu dute EH Bilduk lezoarrak “zigortu” egin zituela zerga presio handia ezarriz, “hori arindu egin dugu”. Zirkulazio zerga txikitu, eta familia ugarientzat nahiz gizarte laguntzak jasotzen dituztenentzat hobariak eta salbuespenak ezarri direla adierazi dute. “Gainera, lau urte hauetan udal zerga eta tasak ez dira igo”. Udal zorra amortizatzen joan direla adierazi du PSE-EEk, eta inbertsioen atala indartu dutela, adibidez Herri Eskolaren jolaslekuan estalkia jarriz, hainbat kale berrituz, parkeak eta udal eraikinak hobetuz, eta Altamira eta herrigunea lotuko dituen igogailua eginez. Enplegu planetarako eta gizarteratze egitasmoetarako udal aurrekontuaren %3 (urteko 175.000 euro) bideratu dutela esan du alderdiak.
Ingurumen arloari dagokionez, herriko biodibertsitatea hobetzeko “ekintza asko” egin direla nabarmendu du PSE-EEk, erreka eta errekastoetan batik bat. Eraginkortasun energetikoan eta ingurumen sentsibilizazioan sakondu dutela aipatu du ere. Azpimarra jarri du azken horretan Jose Angel Sanchez zinegotziak: “Agintaldiko unerik gorenetakoa izan da hondakinak jasotzeko sistema aldatzea. EH Bilduk ezarritako atez atekotik, sistema garbiago, ekonomikoago, eta demostratu den bezala eraginkortasunean atez atekoaren pareko den sistema dugu, birziklatze tasa altuak lortzen dituena, %80 ingurukoak”. PSE-EEk esan du, adi ibiliko dela aurrerantzean “berriz ere atez atekoa jar ez dadin”.
Beste erakundeekin elkarlana
Sanchezek “aurreko urteetan hautsitako” erakundeen arteko hartu-emana aldatu eta handitu egin dela adierazi du. Horren ondorioz, gazteentzat alokairuzko 50 etxebizitza egingo direla (Aralar kalean), Donibanerako bidegorria, Altamirako igogailua, edo tren geltokiko lanak egin ahal izango direla adierazi du Sanchezek. Beste hainbat alorretan aurrera atera diren beste egitasmo batzuk baikor baloratu ditu sozialistak, “horiekin harro gaude”. Horien artean Sanchezek aipatu ditu gazteentzat alokairuzko etxebizitzetara joateko laguntzak, adinekoentzako parke osasuntsuen programa, Altamiran eman zen parte hartze prozesua, edo Berdintasun teknikaria lanean hasi izana.
