Bikote pasaitar bat etxea galtzear dela salatu du Kaleratzeak Stop plataformak
Etxebideren aurrean prentsaurrekoa egin dute, bikoteari alokairu sozialeko etxebizitza zuzenean esleitu diezaioten eskatzeko.
Miren Schnitger eta Aitor Iriarte hilaren 28an kalean gera daitezke aurrez alokairu sozialeko etxebizitza esleitzen ez badiete. Rosa Garcia buru zutela eta kaltetu zuzenak bertan zirela elkarretaratzea eta prentsaurrekoa egin du gaur goizean Donostian, Etxebideren egoitzaren sarreran, Kaletaratzeak Stop plataformak.
Bi kaleratzeen berri eman dute agerraldian, baina horietako bat, “presio soziala eta mobilizazioen” ondorioz konponbidean dela jakinarazi du plataformako bozeramaile Rosa Garciak.
Alokairua ez ordaintzeagatik Zorroaga Fundazioak hiru seme-alaba dituen emakume gazte bat salatu eta kaleratu behar zuen. Prentsaurrekoan jakinarazi dutenez, baina, salaketa erretiratu du atzo fundazioak, eta Donostiako Etxegintza alokairuzko etxe bat eskaini diezaieten lanean hasia dela iragarri dute.
Oso bestelakoa da pasaitar bikotearen egoera. Miren Schnitger eta Aitor Uriartek otsailaren 28an beren egungo etxea, alokairuzkoa, utzi behar dute. Jada kalean ez badaude aurrez maizterrak lau hilabeteko luzapena eman dielako izan da, baina merkatu libreko alokairua ordaintzeko adina diru ez dute eta egunak agortzen doaz. Bikoteak hiru urteko haur bat du eta bigarrena bidean, eta kolektibo zaurgarri bateko kide diren heinean, Kaleratzeak Stop plataformak bikoteari alokairu sozialeko etxebizitza bat zuzenean esleitu diezaion eskatu dio Etxebideri.
Gaur jakinarazi dutenez, gainera, eskaera bera egin dio Pasaiako Udalak Etxebideri, gizarte zerbitzuen bidez, baina, oraingoz, tamalez, erantzunik ez.
Beste askoren arazoa
Gaur salatu dituzten kasuak ez direla kasu isolatuak nabarmendu dute gaurko agerraldian Kaleratzeak Stop plataformak, eta jende asko antzeko egoerak pairatzen dituela salatu. Plataformak erraztutako datuen arabera, gaur egun EAEn alokairuaren batez bestekoa 1123 euroko da, soldaten batez bestekoaren gainetik.
“Prezioen burbuila espekulatiboaren arazoari” EAEk duen “alokairuzko babestutako etxebizitza parke publiko eskasa” gehitu behar zaiola ohartarazi dute.
Gauzak honela, plataforman biltzen dira askotariko eragileak manifestu bat lantzen ari direla iragarri dute, epe motzean publiko egingo duten manifestua, “denon eskura egongo den etxebizitza duina egiazko eskubidea izan dadin”.
